O conselleiro de Cultura, Lingua e Xuventude, José López Campos, acompañado polo secretario xeral da Lingua, Valentín García, presentou no colexio López Ferreiro, en Santiago de Compostela, o programa de dinamización lingüística ‘Falamos +’, no que participan dez centros repartidos polas catro provincias co obxectivo de “impulsar o uso da lingua galega entre a cativada desde a perspectiva do lecer dentro do ámbito escolar”.

Fonte: O Portal da Lingua Galega

O Concello de Marín convoca o XVIII Premio de Narración Curta con motivo do Día das Letras Galegas, dedicado ás cantareiras como transmisoras da poesía oral popular. O certame premiará a orixinalidade e a calidade literaria cun único galardón de 1000 euros. Os traballos estarán en galego e deben ser orixinais e inéditos, de temática libre e cunha extensión de entre 5 e 10 páxinas.

Fonte: Morrazo Noticias

O Tribunal Superior de Xustiza de Galicia rexeitou o recurso que reclamaba o uso do castelán en toda a documentación e rótulos do CEIP Cidade Vella da Coruña, ao considerar que a normativa avala o galego como lingua por defecto na educación. O tribunal recoñece o dereito das familias a recibir comunicacións en castelán se o solicitan, mais non a esixir que toda a documentación interna estea neste idioma. A sentenza conclúe que non se vulnerou a cooficialidade lingüística nin os dereitos do demandante.

Fonte: Faro de Vigo

O Servizo de Normalización Lingüística da USC publicou a versión en galego do HTA Glossary, un dicionario multilingüe sobre avaliación de tecnoloxías sanitarias promovido por redes internacionais. Esta adaptación aproveitou os contidos en inglés, español e francés e incorporou equivalentes e definicións en galego. Ademais, creouse unha interface interactiva que mellora a consulta e permite actualizar o glosario constantemente, o que reforza a dispoñibilidade de recursos en galego no ámbito da saúde.

Fonte: Universidade de Santiago de Compostela

A Universidade de Santiago de Compostela revisou e avalou a publicación da primeira gramática do galego en checo, escrita polo hispanista Bohumil Zavadil e publicada pola Universidade Carolina de Praga. A obra analiza a lingua desde unha perspectiva funcional-estrutural e aborda aspectos fonolóxicos, morfolóxicos e sintácticos, con exemplos literarios. Con esta obra contribúese á proxección do galego e ao fortalecemento dos vínculos académicos entre Galicia e a República Checa.

Fonte: Universidade de Santiago de Compostela

Os obradoiros de acollemento lingüístico, dirixidos a persoas que queren aprender galego, son cursos presenciais que se desenvolven en quendas de primavera e outono, con 36 horas lectivas. Están abertos principalmente a persoas de outras comunidades lingüísticas, pero tamén a calquera adulta interesada no galego.

Fonte: Concello de Santiago de Compostela

O secretario xeral da Lingua, Valentín García, participou hoxe na presentación da oitava edición do festival Alguén que respira!, unha cita organizada co apoio da Xunta de Galicia para poñer en valor o talento dos creadores galegos e a calidade das letras galegas a través da poesía.

Fonte: O Portal da Lingua Galega

O Curso de redacción de documentos técnico-xurídicos en galego, organizado pola Escola Galega de Administración Pública, desenvolverase entre o 5 e o 19 de maio de 2025 na modalidade de teleformación.

Fonte: Consello da Cultura Galega

A Xunta de Galicia acaba de publicar no Diario Oficial de Galicia a convocatoria para inscribirse nas probas que permiten obter os certificados acreditativos dos niveis de lingua galega Celga 1, 2 3 e 4. Os exames realizaranse en maio de forma presencial e simultaneamente en Santiago de Compostela, Ponferrada e Madrid, cidade onde se retoma a súa realización despois de 11 anos.

Fonte: O Portal da Lingua Galega

A Xunta de Galicia acaba de abrir o prazo para que as entidades locais soliciten as axudas destinadas a levar a cabo accións de promoción do uso da lingua galega, para o que a Consellería de Cultura, Lingua e Xuventude achega 350 000 €.

Así, a convocatoria, publicada no Diario Oficial de Galicia e aberta ata o 4 de abril, está dirixida a fomentar a prestación dun servizo lingüístico, ben mediante a súa creación ou co reforzamento dun xa existente, promovendo o desenvolvemento de programas de dinamización en concellos. Ademais, tamén se impulsa cos agrupamentos de municipios a incorporación de localidades de menos de 3000 habitantes que se poidan atopar con menos recursos para desenvolver estas tarefas.

Fonte: O Portal da Lingua Galega