O secretario xeral da Lingua, Valentín García, participou na presentación da foliada das letras galego-portuguesas «Agora cantamos nós». Trátase dunha iniciativa que organiza «Ponte... nas ondas!», a quen agradeceu o seu traballo no reforzo dos lazos coa lusofonía.

Fonte: O Portal da Lingua Galega

O secretario xeral da Lingua, Valentín García, asistiu á XXII edición do Festival de Cine de Cans que acolleu a apertura da exposición «Cans senior» e a inauguración da rúa efémera dedicada á cineasta galega Cruz Risco. No acto, acompañado por un grupo de alumnos gañadores do certame «Nós tamén creamos!», destacou a importancia da creación en galego como referente para as novas xeracións.

Fonte: O Portal da Lingua Galega

O presidente da Xunta, Alfonso Rueda, acompañado doutros membros do Goberno galego, presidiu a Sesión Plenaria Extraordinaria e Pública da Real Academia Galega con motivo do Día das Letras Galegas 2025 celebrada no Centro Cívico Cultural de Malpica de Bergantiños.

Fonte: O Portal da Lingua Galega

A Xunta volve colaborar un ano máis coa Vegalsa-Eroski na campaña das Letras Galegas coa que esta distribuidora alimentaria homenaxea as cantareiras e a poesía popular oral. Para iso, durante todo o mes de maio exhibirá nos seus 150 establecementos de toda Galicia carteis conmemorativos e repartirá entre os seus clientes unha edición especial das súas bolsas da compra.

Fonte: O Portal da Lingua Galega

O certame Enreguéifate celebrou a entrega de premios no Auditorio de Galicia, tras unha edición histórica con récord de participación. O proxecto, promovido por varios concellos, ten como obxectivo impulsar a regueifa e a improvisación oral en galego entre a cidadanía, e sitúase como unha iniciativa de referencia na promoción da lingua e da tradición oral.

Fonte: Praza

A CRTVG lanza G24Play, un novo servizo informativo en galego adaptado ao consumo móbil, con vídeos breves, subtitulados e en formato vertical. Esta plataforma independente permite informar sen depender dos algoritmos das grandes redes sociais, ao tempo que facilita o acceso á actualidade de Galicia e do mundo dun xeito áxil e compartible.

Fonte: CRTVG

Miles de persoas manifestáronse en Santiago o 17 de maio para reivindicar o uso do galego e denunciar a súa exclusión de múltiples ámbitos sociais. A mobilización, convocada por Queremos Galego, culminou cunha foliada no Obradoiro e a lectura dun manifesto que apelou á dignificación da lingua e á responsabilidade institucional para recuperar falantes.

Fonte: Galicia Confidencial

A Xunta de Galicia acaba de abrir a convocatoria de 10 prazas de lectorados para reforzar o ensino da lingua, literatura e cultura galegas en dúas comunidades autónomas e seis países estranxeiros para o 2025. Así se recolle no Diario Oficial de Galicia que publicou xa a convocatoria das seis prazas para persoal bolseiro e catro para contratado.

Fonte: O Portal da Lingua Galega

A Facultade de Comunicación acolleu un acto no que recibiu o distintivo de galeguización Gal Ego que recoñece a súa implicación co idioma, ao tempo que se entregaron tamén os Premios de poesía, relato curto e tradución 2025 que poñen en valor a capacidade creativa en galego da comunidade universitaria.

Fonte: Universiade de Vigo

A Xunta de Galicia e Renfe Viajeros volven poñer en marcha a campaña das Letras Galegas co obxectivo de achegarlle as cantareiras ás persoas usuarias da rede ferroviaria. O secretario xeral da Lingua, Valentín García, e a delegada territorial da Xunta en Vigo, Ana Ortiz, presentaron a campaña na cidade olívica onde salientaron “a relevancia das homenaxeadas e a súa importante aportación ao noso patrimonio inmaterial”.

Fonte: O Portal da Lingua Galega