O concurso escolar sobre o Día das Letras Galegas convocado pola Consellería de Cultura, Lingua e Xuventude e a de Educación, Ciencia, Universidades e Formación Profesional, e dirixido aos centros de ensino público, xa ten gañadores. Así, nesta edición a comisión avaliadora decidiu que os mellores traballos, coas cantareiras e a poesía popular oral como protagonistas, corresponden ao colexio Celso Emilio Ferreiro, do municipio coruñés de Cerceda, na categoría  de Infantil e Primaria, e ao Instituto Castelao, de Vigo, na categoría de Secundaria.

Fonte: O Portal da Lingua Galega

O secretario xeral da Lingua, Valentín García, participou na presentación da guía didáctica O Seminario de Estudos Galegos, elaborada polo Instituto de Estudos Galegos Padre Sarmiento, o centro de investigación mixto do Consejo Superior de Investigaciones Científicas e a Xunta de Galicia co fin de achegar o traballo desta entidade á rapazada dun modo divulgativo.

Fonte: O Portal da Lingua Galega

O conselleiro de Cultura, Lingua e Xuventude, José López Campos, salientou as propostas que está levando a cabo a  Xunta para implicar as xeracións máis novas “nun maior emprego e prestixio do galego”. Fíxoo durante a celebración do III Encontro 21 días co galego e +, actividade lúdica na que estaban convidados preto de 4000 rapaces, mestres e persoal administrativo e de servizos da decena de centros educativos de toda Galicia. Todos eles participaron este ano na sétima edición deste programa de dinamización lingüística, impulsado polo Goberno autonómico.

Fonte: O Portal da Lingua Galega

Talía Teatro, veterana compañía galega orixinaria de Cee, estrea o venres 28 na Casa da Cultura desta localidade o seu espectáculo Un deus salvaxe, versión en galego da coñecida obra da francesa Yasmina Reza, que ten sido representada en escenarios de todo o mundo e levada á gran pantalla por Roman Polanski. Artur Trillo dirixe esta nova produción, que xunto con DeseXo, forma parte do proxecto plurianual polo que a Xunta de Galicia subvencionou a formación na convocatoria de axudas á creación escénica de 2023.

Fonte: O Portal da Lingua Galega

O secretario xeral da Lingua, Valentín García, participou hoxe á tarde no acto de homenaxe a Alfredo Brañas polo seu 125º cabodano. O acto celebrouse diante da casa natal do xurista, xornalista e político carballés, pai do rexionalismo galego.

Fonte: O Portal da Lingua Galega

O conselleiro de Cultura, Lingua e Xuventude, José López Campos, participou hoxe en Santiago nos actos organizados con motivo do Día de Rosalía, en homenaxe a unha das figuras máis destacadas da cultura galega na data do seu nacemento, no que salientou “a importancia de ter sempre no recordo, non só nas efemérides, ás mulleres e homes que construíron a nosa identidade”, apuntando que “sobre todo, os que temos a responsabilidade institucional nestes momentos de preservar, poñer en valor e difundir o seu legado para o futuro, debemos ter sempre presente o seu exemplo”.

Fonte: O Portal da Lingua Galega

O Parlamento de Galicia aprobou unha iniciativa para instar a Xunta a elaborar un libro branco sobre a lingua galega e a presentar medidas urxentes para frear o descenso do seu uso. A moción tamén propón un acordo político e social para reforzar a protección do idioma.

Fonte: Diario de Santiago

O secretario xeral da Lingua, Valentín García, participou hoxe no acto de presentación do libro Cantareiras de Xosé Manuel Varela e Icía Varela, onde puxo en valor a literatura e poesía popular a través das figuras das cantareiras ás que este 2025 se lle dedica o Día das Letras Galegas.

Fonte: O Portal da Lingua Galega

Un estudo sobre os cemiterios de Meis revela que, malia ser a lingua habitual da veciñanza, o galego apenas se usa nas inscricións funerarias, cunha presenza do 2,17 %. A primeira lápida en galego data de 1986, e nos últimos anos obsérvase unha lixeira tendencia á alza, impulsada polo relevo xeracional.

Fonte: Faro de Vigo

Miles de persoas manifestáronse en Santiago para reclamar maior apoio ao galego, nun acto convocado pola Plataforma Queremos Galego. A mobilización, que coincidiu co Día de Rosalía, denunciou a “emerxencia lingüística” que vive o idioma e esixiu accións concretas por parte do Goberno galego.

Fonte: Faro de Vigo