Esta nova edición do obradoiro de acollemento lingüístico, destinado a persoas de fóra de Galicia que queren coñecer a lingua e a cultura galegas, desenvolverase a partir do 4 de febreiro e inclúe un manual de contidos para o alumnado.

Fonte: Concello de Carballo

A Xunta activa a plataforma a través da que as empresas editoras interesadas e que cumpran os requisitos poden ofrecer as súas obras, en galego e en formato físico, ás entidades da Rede de Bibliotecas Públicas de Galicia. Así, o Diario Oficial de Galicia vén de publicar a orde pola que se regulan as condicións de participación e se abre o período de incorporación das novidades editoriais a este sistema.

Fonte: O Portal da Lingua Galega

A convocatoria anual de subvencións da Xunta á creación audiovisual para a promoción do talento galego neste sector conta en 2025 cunha dotación de 176 000 euros para 11 novas curtas e longametraxes en versión orixinal galega. Segundo as bases publicadas no Diario Oficial de Galicia, con esta contía contribuirase á realización de seis novas curtametraxes con 8000 euros por proxecto, á posprodución de dúas curtas, con 4000 euros en cada caso, e á produción de tres longametraxes de dirección novel, con 40 000 euros por filme.

Fonte: O Portal da Lingua Galega

O Concello de Soutomaior lanza a campaña "Goza do teu punto G, o galego dáche un punto" para promover o uso do galego no día a día da veciñanza. Con iniciativas no ámbito da administración, as artes, a música, o deporte e as TIC, buscan poñer en valor o idioma e fomentar a súa presenza en actividades culturais, educativas e económicas. A campaña inclúe unha ampla programación cultural e medidas específicas para reforzar o galego na mocidade, no deporte e nas redes sociais.

Fonte: Pontevedra Viva

A Real Academia Galega e PuntoGal convocan o VIII Concurso de microrrelatos, co obxectivo de fortalecer a presenza do galego no ámbito dixital. O certame, dirixido a persoas de todas as idades, premiará as mellores historias de ata 200 palabras en tres categorías: infantil, xuvenil e adulta. A convocatoria estará aberta durante todo febreiro, coincidindo cunha promoción para rexistrar dominios .gal a prezo reducido.

Fonte: Real Academia Galega

Publícanse na rede dous novos recursos lexicográficos relacionados coa lingua galega e que xa poden consultarse de balde: a 2ª edición do Dicionario galego-ruso, obra do investigador Aleksandr Dziuba; e o Dicionario do galego do Bierzo, elaborado por Sara Rodríguez.

Fonte: Consello da Cultura Galega

O secretario xeral da Lingua, Valentín García, puxo en valor a “riqueza histórica, monumental e documental” que acubilla o patrimonio señorial de Galicia, “tamén en materia de léxico e toponimia”. Así o salientou na inauguración no Pazo de San Roque, en Santiago de Compostela, da exposición itinerante “Os nosos castelos: San Paio de Narla e os seus señores”.

Fonte: O Portal da Lingua Galega

O Proxecto Xenoma Galicia protagoniza o novo especial de Proxector, iniciativa do Consello da Cultura Galega e a USC para divulgar ciencia en galego. Este especial inclúe doce vídeos que explican o ADN, o xenoma e os avances da medicina personalizada grazas á xenómica.

Fonte: Consello da Cultura Galega

Os centros educativos de Redondela, xunto co Concello, impulsan a iniciativa «Unha semaniña enteira» para fomentar o uso do galego entre a mocidade, coincidindo co Día de Rosalía. O proxecto reta o alumnado a falar galego durante unha semana completa e conta coa colaboración de clubs deportivos e asociacións locais, que difundirán a campaña nas súas actividades e redes sociais.

Fonte: Faro de Vigo

A Mesa pola Normalización Lingüística denuncia que o proxecto de lei de intelixencia artificial da Xunta exclúe o galego ao non prever o seu uso nos sistemas de IA que interactúan coa cidadanía. Critican a falta de medidas para garantir os dereitos lingüísticos nesta tecnoloxía e consideran que a iniciativa desincentiva o desenvolvemento de asistentes virtuais en galego.

Fonte: Galicia Confidencial