A Xunta alcanzará as 100 entidades contactadas a finais de abril coas xuntanzas que están a manter as comisións formadas para a renovación do Plan xeral de normalización da lingua galega. Así o anunciou o conselleiro de Cultura, Lingua e Xuventude, José López Campos, que incidiu no “carácter social” co que se está a enfocar este proceso de actualización “no que implicamos a todo tipo de institucións, asociacións, colectivos e persoas individuais que xa están a dar os seus puntos de vista a través dos grupos de traballo establecidos”.

Fonte: O Portal da Lingua Galega

A Xunta acaba de resolver a concesión de 150 000 euros en axudas a oito produtoras galegas de videoxogos a través da súa nova convocatoria de subvencións para o desenvolvemento do sector. Esta contía investirase noutros tantos proxectos de selo galego co obxectivo de facilitar a chegada ao mercado de contidos feitos en Galicia e no noso idioma, ademais de favorecer a profesionalización e a creación de emprego por parte das empresas que traballan neste ámbito.

Fonte: O Portal da Lingua Galega

O informe sobre o uso do galego, o castelán e outras linguas na docencia da USC revela que o galego acadou este curso o seu mellor dato da última década, cun 25 % de uso, fronte a unha baixada do castelán e unha presenza residual doutras linguas. O campus de Lugo presenta un emprego máis elevado da lingua propia, mais o peso do de Santiago reduce o impacto estatístico global. Por áreas, destacan as Ciencias Sociais polo uso maioritario do galego, mentres nas Ciencias da Saúde este apenas supera o 6 %. Tamén medra a presenza do galego nos estudos de mestrado.

Fonte: Culturagalega

A plataforma Galicia Nomeada superou o medio millón de topónimos xeorreferenciados grazas á participación cidadá, que permite recuperar nomes tradicionais de leiras, camiños ou fontes. Desde 2019, veciñanza, centros educativos e persoas estudosas achegaron máis de 88 000 microtopónimos, entre os que destaca a implicación de concellos como Vigo ou Outeiro de Rei. A aplicación permite engadir información complementaria e continúa a medrar, con só catro municipios sen colaboración activa.

Fonte: Real Academia Galega

O certame «Ben Veñas, Maio», organizado polo Concello de Pontevedra para promover o uso do galego entre a mocidade, volve celebrar unha nova edición dirixida ao alumnado de secundaria, bacharelato e ciclos formativos. A actividade, xa consolidada tras máis de vinte anos de traxectoria, repartirá 3750 euros en premios a través das distintas categorías que a integran.

Fonte: Concello de Pontevedra

O Concello de Carballo impulsa de novo o proxecto «Carballo na memoria» con rutas pola microtoponimia urbana, guiadas por Fernando Cabeza Quiles, nas que participa alumnado de secundaria e bacharelato. A iniciativa busca recuperar nomes tradicionais de lugares que están a desaparecer. Estas rutas, iniciadas nas xornadas de setembro, contribúen tamén ao proxecto Galicia Nomeada, no que xa se rexistraron máis de 1100 microtopónimos grazas á colaboración veciñal.

Fonte: Concello de Carballo

A Xunta de Galicia fixo públicas no Diario Oficial de Galicia as ordes que establecen as bases de dúas convocatorias de axudas destinadas ao libro galego: unha dirixida á tradución para o galego de obras editadas inicialmente noutras linguas e outra destinada á tradución a outras linguas de obras publicadas orixinariamente en galego.

Fonte: Consello da Cultura Galega

O secretario xeral da Lingua, Valentín García, participou na homenaxe a Teresa Rodríguez Castelao, irmá de Afonso Daniel, organizada polo Partido Galeguista co gallo do 25º aniversario do seu pasamento. A homenaxe, consistente nun oficio relixioso que acolleu a igrexa de Santa Comba e  nunha ofrenda floral na sepultura na que Teresa repousa canda a outra irmá, Josefina, no camposanto rianxeiro. Os actos foron organizados polo Partido Galeguista no marco da celebración do Ano Castelao e neles participaron tamén canda García Gomez o secretario xeral do Partido Galeguista, Francisco López; o alcalde de Rianxo, Julián Bustelo; o herdeiro de Afonso Daniel Rodríguez Castelao, Javier Baltar, e o párroco Marcelino Sánchez.

Fonte: O Portal da Lingua Galega

O secretario xeral da Lingua, Valentín García, acompañado polo director da Axencia para a Modernización Tecnolóxica de Galicia, Julián Cerviño, presentou a adaptación do curso Celga 2 en liña á lectura fácil para facer accesible o coñecemento da lingua a toda a sociedade. Trátase dunha ferramenta dispoñible no Portal da Lingua Galega que, a través desta actualización, permite a autoformación con contidos e información accesible a persoas con discapacidades cognitivas que queiran acadar a certificación no idioma galego.

Fonte: O Portal da Lingua Galega

A mesa «Administración, a xustiza e os servizos públicos», celebrada no marco do foro «Un país coa súa lingua» do Consello da Cultura Galega, propuxo medidas para reforzar o uso do galego na administración e no ámbito xudicial, como traducir programas e formularios ou mellorar a formación lingüística do persoal. Destacouse a escasa presenza do galego nas resolucións xudiciais e a necesidade de superar inercias históricas mediante políticas públicas eficaces e maior investimento na normalización. Tamén se pediu regular legalmente a planificación lingüística para garantir dereitos e promover a igualdade.

Fonte: Consello da Cultura Galega