Máis de 300 escolares de primeiro e segundo de Educación Secundaria participaron na Cidade da Cultura, en Santiago de Compostela, na gala de clausura da primeira edición do programa radiofónico “Fala que fala”, organizado por Radio Líder co apoio da Xunta “contribuíndo a incentivar a rapazada a incrementar o uso do galego nos seus espazos creativos e de lecer”, segundo o puxo en valor na súa intervención o secretario xeral da Lingua, Valentín García.

Fonte: O Portal da Lingua Galega

O alumnado do Grao de Educación Primaria de Ourense levou a cabo o proxecto «Educar na diversidade, transformar a sociedade», centrado no fomento da comunicación en galego. A iniciativa, que se realizou en colaboración co CEIP Mestre Vide, consistiu en actividades como xogos, contacontos e dramatizacións, e tivo como obxectivo mellorar as competencias comunicativas dos futuros docentes.

Fonte: Universidade de Vigo

Nogueira de Ramuín considérase o berce dos afiadores ourensáns, un oficio que foi clave para a economía local e que deixou un importante legado cultural cunha linguaxe propia, o «barallete», que servía como código entre eles e que está en risco de perderse. O Concello quere preservar esta tradición, polo que está a impulsar a reedición dun libro de Santiago Bonay que recolle unha ampla recompilación de vocabulario e expresións deste oficio.

Fonte: Faro de Vigo

O goberno local de Ferrol abriu o prazo de inscrición para o curso Comunicación en lingua galega de nivel 2, dirixido a persoas en situación de desemprego e sen a ESO ou equivalente. Este curso, de 138 horas e de balde, forma parte da oferta de competencias clave financiada pola Xunta.

Fonte: Diario de Ferrol

Isadora Moon, a protagonista dunha popular serie de libros infantís, chega agora ao galego coa publicación dos volumes Isadora Moon vai á escola e Isadora Moon quere axudar pola editorial Bululú. A serie, escrita por Harriet Muncaster, está dirixida a nenos e nenas de 5 a 8 anos.

Fonte: Praza

O noveno volume da serie Toponimia do Val de Fragoso aborda máis de 150 topónimos da parroquia de Teis. A obra, elaborada por Vera Álvarez Suárez, recolle nomes relacionados coa auga, como regatos, ríos, fontes e praias, e describe a súa orixe histórica e etimolóxica. O traballo destaca a importancia de conservar e difundir a toponimia como parte da nosa memoria oral.

Fonte: Universidade de Vigo

Os Premios Mil Primaveras, creados pola CTNL en 2019, recoñecen e difunden proxectos que fomentan o uso e prestixio do galego. A sexta edición péchase o 7 de xuño coa entrega de galardóns a catro proxectos destacados: Brazolinda, «Galego para peques», «Modo galego, actívao!» e «Vitamina G» nun evento no Pazo de Cultura de Pontevedra.

Fonte: Premios Mil Primaveras

O Correlingua celebrou o seu 25 aniversario cunha participación de máis de 14 000 estudantes de once concellos, que se sumaron ás actividades en prol da lingua galega baixo o lema «A mocidade activa por unha lingua viva».

Fonte: Nós Diario

O XVI Premio Rosalía de Castro recoñeceu este ano o labor de Xosé Ramón Freixeiro Mato, a asociación Ponte... nas ondas! e os proxectos CeibaRimas e Galego para peques. As iniciativas galardoadas destacan pola súa contribución á promoción do galego na investigación, na cultura e na creación de contidos para a infancia e a mocidade, o que reforza a vitalidade da lingua en espazos emerxentes e na sociedade actual.

Fonte: Deputación da Coruña

O conselleiro de Cultura, Lingua e Xuventude, José López Campos, avanzou hoxe no Museo Centro Gaiás as liñas de traballo da exposición inmersiva Castelao. Mirar por Galicia. Realizada coa colaboración da Fundación Castelao, a mostra representa a experiencia tecnolóxico-cultural máis avanzada ata o momento ao redor de Alfonso Daniel Rodríguez Castelao, un percorrido para atravesar o devir persoal, literario, artístico e político dunha das figuras máis senlleiras de Galicia. 

Fonte: O Portal da Lingua Galega