A Deputación de Pontevedra destina axudas de 150 000 euros para concellos de menos de 50 000 habitantes, co obxectivo de fomentar o uso do galego en 2025. As subvencións financiarán actividades de dinamización lingüística, estudos sociolingüísticos, campañas no comercio e recoñecementos a iniciativas en galego. O financiamento cubrirá ata o 75 % dos gastos de infraestruturas, servizos profesionais, publicacións, promoción e contratación artística.

Fonte: Deputación de Pontevedra

A Mesa pola Normalización Lingüística e a Fundación Vía Galego recuperan LongaLingua, agora en formato dixital e podcast, baixo a dirección da xornalista Eva Fernández Prieto. A publicación ofrecerá análises de persoas expertas sobre a situación do galego en diversos ámbitos, acompañadas de videopodcast en plataformas como Spotify e YouTube.

Fonte: Consello da Cultura Galega

A Universidade de Vigo reforza o seu compromiso co galego coa segunda edición do selo “Gal Ego”, un distintivo que recoñece as facultades e escolas máis activas no uso da lingua en todas as súas actividades. Os centros galardoados recibirán unha insignia e unha axuda de 3000 euros para novas iniciativas lingüísticas, cunha vixencia de catro anos.

Fonte: Universidade de Vigo

A convocatoria dos XXXV Cursos de verán “Galego sen fronteiras” está aberta ata o 4 de abril para ofrecerlles a persoas de todo o mundo a oportunidade de mergullarse na lingua e cultura galegas en Santiago de Compostela. Desenvolveranse do 3 ao 24 de xullo con aulas teóricas e prácticas, ademais de encontros con profesionais que traballan en galego.

Fonte: Real Academia Galega

A Xunta de Galicia abre a convocatoria de subvencións para 2025 dirixidas ás entidades locais co fin de fomentar o uso do galego. As axudas destínanse á creación e reforzo de servizos de normalización lingüística e a programas de dinamización do idioma. Poderán solicitalas concellos ou agrupacións cunha poboación mínima de 3000 habitantes.

Fonte: Consello da Cultura Galega

A Xunta de Galicia, en colaboración coa Radio Galega, vén de convocar o VII Concurso de Podcasts-Radio na biblio, que nesta edición está dedicado ás cantareiras e á poesía popular oral, ás que se lle rende homenaxe co gallo do Día das Letras Galegas 2025. 

O obxectivo deste certame é estimular, mediante o recoñecemento de boas experiencias, a elaboración de produtos radiofónicos en galego, reforzar o coñecemento da poesía alén da escrita e o seu carácter colectivo, a relación entre a literatura e a música, o papel das mulleres como creadoras e a importancia das cantigas galegas como tradición viva da poesía popular oral a través de novas manifestacións. 

Fonte: Xunta de Galicia

A Confederación Anpas Galegas comprométese a utilizar exclusivamente o galego na súa actividade e na difusión de contidos, ademais de impulsar campañas periódicas a favor do idioma, unha decisión que abrangue as nove federacións e preto de 500 asociacións que a conforman. A entidade só difundirá materiais en galego e solicitará a documentación nese idioma cando reciba textos noutras linguas. Ademais, esixirá que os medios de comunicación respecten o uso do galego nas transcricións das súas intervencións.

Fonte: Galicia Confidencial

Os concellos de Santiago, Ferrol, Carballo e Pontevedra presentan diversas actividades para promover o galego entre a infancia e as familias ao abeiro do proxecto Apego. Santiago centrarase na igualdade de xénero en marzo, mentres Ferrol ofrecerá tardes de contos e música. Pola súa banda, Carballo organizará eventos lúdicos en galego con teatro, xogos, obradoiros... e Pontevedra levará a diferentes localizacións da cidade a serie lúdica e didáctica «Un pobo con historia de seu».

Fonte: Consello da Cultura Galega

Os datos do Barómetro de Hábitos de Lectura e Compra de Libros 2024 reflicten que a lectura en galego apenas mellorou respecto ao 2023, cun 3,8 % da poboación que o escolle como lingua preferida. A compra de libros en galego tamén aumentou lixeiramente ata o 6,1 %. O motivo principal para mercar libros en Galicia segue a ser o ocio. Nos audiolibros, o galego apenas alcanza o 2,5 %, fronte á clara predominancia do castelán e do inglés.  

Fonte: Consello da Cultura Galega

Na xornada “Educación e socialización” propúxose un proxecto piloto de ensino con galego como lingua vehicular para garantir competencias lingüísticas equilibradas co castelán, xa que os datos actuais evidencian unha carencia nese aspecto. A iniciativa, voluntaria e consensuada, permitiríalles aos centros maior autonomía e ás familias escoller o modelo educativo. A avaliación realizaríase tras tres ou catro anos para medir os resultados.

Fonte: Consello da Cultura Galega