A Facultade de Ciencias Xurídicas e do Traballo convoca a cuarta edición do Premio de Investigación Xurídica en Lingua Galega Xosé Luis Franco, co obxectivo de promover o uso do galego no ámbito xurídico. O certame está destinado ao alumnado de grao e mestrado de todo o Estado e divídese en dúas modalidades: unha aberta a todas as universidades e outra específica para a Universidade de Vigo. Os traballos deben ser orixinais, presentados en galego e enviados antes do 25 de abril. O premio constará de 500 euros e un diploma acreditativo.

Fonte: Universidade de Vigo

A Fundación Florencio Delgado Gurriarán presenta unha plataforma en liña para recoller o léxico propio de Valdeorras grazas á participación da veciñanza e coa coordinación da súa comisión de lingua. A iniciativa busca crear un dicionario da fala da comarca para o que se organizarán eventos e colaboracións con centros educativos e especialistas en cultura local para a recollida de léxico.

Fonte: Culturagalega

O conselleiro de Cultura, Lingua e Xuventude, José López Campos, salientou hoxe o “importante papel” que exerce a creación literaria infantil en galego para “incorporar e incrementar novos lectores e falantes á nosa lingua”. Fíxoo durante a súa participación no acto de recoñecemento á escritora Rosalía Morlán como filla predilecta do concello coruñés de Trazo.

Fonte: O Portal da Lingua Galega

O conselleiro de Educación, Ciencia, Universidades e FP, Román Rodríguez, participou hoxe na entrega dos premios da 28ª edición do Premio literario San Clemente, organizado polo Instituto IES Rosalía de Castro de Santiago de Compostela. Un certame a prol da cultura literaria e, especialmente, do fomento do hábito lector entre o alumnado. Así o sinalou o representante da Xunta, que estivo acompañado polo secretario xeral da Lingua, Valentín García, e o director xeral de Centros e Recursos Humanos, Jesús Álvarez.

Fonte: O Portal da Lingua Galega

O conselleiro de Cultura, Lingua e Xuventude, José López Campos, considerou “clave” a creación literaria en galego dirixida aos máis novos para conseguir “incrementar e facer medrar o número de novos lectores e falantes na nosa lingua”. Fíxoo durante a súa visita ao colexio Ortigueira, no municipio coruñés de Vedra, co gallo da programación que desenvolveron no centro escolar para a celebración do Día do Libro Infantil e Xuvenil.

Fonte: O Portal da Lingua Galega

A Xunta alcanzará as 100 entidades contactadas a finais de abril coas xuntanzas que están a manter as comisións formadas para a renovación do Plan xeral de normalización da lingua galega. Así o anunciou o conselleiro de Cultura, Lingua e Xuventude, José López Campos, que incidiu no “carácter social” co que se está a enfocar este proceso de actualización “no que implicamos a todo tipo de institucións, asociacións, colectivos e persoas individuais que xa están a dar os seus puntos de vista a través dos grupos de traballo establecidos”.

Fonte: O Portal da Lingua Galega

A Xunta acaba de resolver a concesión de 150 000 euros en axudas a oito produtoras galegas de videoxogos a través da súa nova convocatoria de subvencións para o desenvolvemento do sector. Esta contía investirase noutros tantos proxectos de selo galego co obxectivo de facilitar a chegada ao mercado de contidos feitos en Galicia e no noso idioma, ademais de favorecer a profesionalización e a creación de emprego por parte das empresas que traballan neste ámbito.

Fonte: O Portal da Lingua Galega

O informe sobre o uso do galego, o castelán e outras linguas na docencia da USC revela que o galego acadou este curso o seu mellor dato da última década, cun 25 % de uso, fronte a unha baixada do castelán e unha presenza residual doutras linguas. O campus de Lugo presenta un emprego máis elevado da lingua propia, mais o peso do de Santiago reduce o impacto estatístico global. Por áreas, destacan as Ciencias Sociais polo uso maioritario do galego, mentres nas Ciencias da Saúde este apenas supera o 6 %. Tamén medra a presenza do galego nos estudos de mestrado.

Fonte: Culturagalega

A plataforma Galicia Nomeada superou o medio millón de topónimos xeorreferenciados grazas á participación cidadá, que permite recuperar nomes tradicionais de leiras, camiños ou fontes. Desde 2019, veciñanza, centros educativos e persoas estudosas achegaron máis de 88 000 microtopónimos, entre os que destaca a implicación de concellos como Vigo ou Outeiro de Rei. A aplicación permite engadir información complementaria e continúa a medrar, con só catro municipios sen colaboración activa.

Fonte: Real Academia Galega

O certame «Ben Veñas, Maio», organizado polo Concello de Pontevedra para promover o uso do galego entre a mocidade, volve celebrar unha nova edición dirixida ao alumnado de secundaria, bacharelato e ciclos formativos. A actividade, xa consolidada tras máis de vinte anos de traxectoria, repartirá 3750 euros en premios a través das distintas categorías que a integran.

Fonte: Concello de Pontevedra