O secretario xeral da Lingua, Valentín García, participou na presentación do libro A Bela Otero de Miguel Ángel Martínez Coello onde salientou o traballo de investigación realizado polo autor sobre a vida desta artista que naceu en Valga no ano 1868.

Fonte: O Portal da Lingua Galega

O Concello de Lugo creou a "Alianza Lugo pola Lingua", unha iniciativa para reverter o preocupante descenso no uso do galego, especialmente entre a mocidade. Con preto de 70 colectivos implicados, a concelleira Maite Ferreiro expuxo un decálogo de medidas para promover o galego en diversos ámbitos e insta a Xunta a modificar a súa política lingüística.

Fonte: Nós Diario

O secretario xeral da Lingua, Valentín García, participou nas homenaxes feitas ao autor Xosé Neira Vilas coincidindo coa celebración do 96 aniversario do seu nacemento. Nos actos, que se levaron a cabo na sede da Fundación que leva o seu nome, fíxose unha lectura continuada de Memorias dun neno labrego, unha das obras máis universais da literatura galega e, de feito, a máis traducida e editada.

Fonte: O Portal da Lingua Galega

O conselleiro de Cultura, Lingua e Xuventude, José López Campos, defendeu a importancia de incrementar a presenza do galego na tecnoloxía e nos espazos dixitais de lecer que emprega a mocidade “como un xeito do máis eficaz para potenciar o uso da nosa lingua entre a xente máis nova”.

Fonte: O Portal da Lingua Galega

O secretario xeral da Lingua, Valentín García, e o director xeral de Cultura, Anxo M. Lorenzo, participaron na presentación das máis de 40 actividades impulsadas pola Xunta de Galicia para celebrar en novembro o Mes da ciencia en galego na Rede de Bibliotecas Públicas de Galicia xestionadas pola Consellería de Cultura, Lingua e Xuventude, así como nas dos centros educativos. O obxectivo desta iniciativa, que se celebra de xeito consecutivo desde o ano 2014, é sensibilizar sobre o valor de empregar a lingua galega na divulgación científica.

Fonte: O Portal da Lingua Galega

A Xunta garantiu os recursos necesarios para a constitución e posta en funcionamento da futura Fundación do Panteón de Galegas e Galegos Ilustres, entidade que estará presidida polo Parlamento de Galicia e que contará coa participación do Executivo autonómico, do Concello e da Arquidiocese de Santiago.

Fonte: O Portal da Lingua Galega

O conselleiro de Cultura, Lingua e Xuventude, José López Campos, destacou que a Xunta de Galicia contará o vindeiro ano cun incremento de máis do 30 % na partida destinada a accións de dinamización da lingua galega. Así o anunciou na Comisión 3º do Parlamento de Galicia, onde compareceu para presentar os orzamentos do seu departamento para 2025.

Fonte: O Portal da Lingua Galega

O presidente da Xunta, Alfonso Rueda, apostou por darlles un maior impulso ás relacións sociais, culturais e económicas cos países lusófonos e defendeu que Galicia cumpre todas as condicións para exercer un papel relevante como “ponte” entre o mundo lusófono e os países hispanos. Así o manifestou durante a presentación e constitución do Observatorio da lusofonía Valentín Paz Andrade, un órgano que estará integrado polas entidades galegas relevantes na relación con estes países -tanto a nivel lingüístico como noutros eidos- e que terá como obxectivo asesorar a Xunta, formular plans de acción e deseñar actividades de coñecemento ou de intercambio.

Fonte: O Portal da Lingua Galega

O conselleiro de Cultura, Lingua e Xuventude, José López Campos, acompañado polo director xeral de Cultura, Anxo M. Lorenzo, inaugurou na Biblioteca de Galicia a exposición «Do soño á apocalipse. Os vieiros da literatura fantástica en galego».

Fonte: O Portal da Lingua Galega

O Concello de Ames presentou a sétima edición dos Premios Lingua e Empresa, unha iniciativa para incentivar o uso do galego no sector empresarial local e promover a normalización lingüística. Os premios recoñecen tanto as empresas cun uso consolidado do galego como as de recente creación que apostan polo idioma, con dous galardóns de 1500 euros cada un e unha campaña en Ames Radio.

Fonte: Concello de Ames