Alexandre Bóveda, Lume Vivo acesa chama, da autoría de Xan Leira e editado por Memoria Documental de Galicia na colección Memoria Viva, rescata unha selección de voces e interpretacións da obra de Alexandre Bóveda.

Fonte: O Portal da Lingua Galega

O Consello Xeral do Poder Xudicial asinou un convenio coa Universidade da Coruña para ofrecer cursos de galego a xuíces e xuízas, como parte dos plans de formación xudicial. O coñecemento do galego considérase un mérito preferente nos concursos para prazas en Galicia. Os cursos, organizados en dous niveis, terán un máximo de 30 participantes, e contarán cun investimento de 23 220 euros.

Fonte: La Voz de Galicia

O Concello de Cospeito, xunto coa Asociación Recreativa e Cultural San Martiño de Pino e Culturalia GZ, convoca a sétima edición do Certame de Poesía Torre de Caldaloba. Publicaranse os dous mellores traballos e o primeiro premio recibiría 1500 euros. Poderán participar persoas maiores de 16 anos cun poemario en galego de entre 300 e 600 versos.

Fonte: El Progreso

A campaña «Toponimízate. Falámosche dos nomes da túa terra» volve o venres 30 de agosto cunha nova sesión en Abadín na que se explicará o funcionamento desta ferramenta que permite o rexistro e a xeorreferenciación de nomes de leiras, montes, camiños e outros microtopónimos tradicionais que corren o risco de se perder.

Fonte: Real Academia Galega

O mércores 14 de agosto, Porto do Son acolle o espectáculo «Radiolímpica 88 FM» da familia de Os Bolechas, dirixido a nenos e nenas de 4 a 9 anos e ás súas familias. O evento mestura teatro de monicreques coas Olimpíadas de París, e ten como obxectivo promover o uso do galego no deporte.

Fonte: O Barbanza

As actividades do proxecto Apego, dirixido á cativada entre 1 e 4 anos para escoitar, participar e socializar en galego, trasládanse os martes de agosto ao parque de Bonaval, onde o acceso é aberto e de balde.

Fonte: Concello de Santiago de Compostela

A Xunta de Galicia destina 200 000 € a colaborar con 46 proxectos na edición en lingua galega de recursos didácticos para niveis non universitarios este 2024. Así se recolle na resolución da convocatoria na que se inclúen catro empresas editoras con sede en Galicia.

Fonte: O Portal da Lingua Galega

A Real Academia Galega organiza esta xornada que, baixo o título Os outros nomes, terá lugar o 19 de outubro no Museo de Pontevedra. Nesta edición estará na ciencia e a intelixencia artificial, a música tradicional e os fanzines, así como nos nomes actuais dos animais de compaña.

Fonte: Real Academia Galega

O conselleiro de Emprego, Comercio e Emigración, José González, participou no acto de entrega dos premios Alecrín de Ouro, uns galardóns que organiza a Federación de entidades culturais galegas de Cataluña (Fegalcat) co obxectivo de recoñecer o traballo a prol da cultura galega por parte de persoas, empresas e entidades de diferentes ámbitos.

Fonte: Xunta de Galicia

Os centros educativos gañadores do concurso escolar «Contádenos o voso Día das Letras de Luísa Villalta», convocado pola Real Academia Galega, foron o CEIP Sada y sus Contornos (Sada), o Colexio Fogar de Santa Margarida (A Coruña) e o CEIP da Espiñeira-Aldán (Cangas).

Fonte: RAG