O alumnado da USC poderá obter créditos de libre configuración tras colaborar con 25 horas de gravación e validación no Proxecto Nós. Contribuirá así á presenza do galego na intelixencia artificial en igualdade coas grandes linguas globais. Con 300 horas de gravacións dispoñibles ata o momento, o obxectivo é alcanzar máis de 1000 horas, grazas ao fomento da participación continua.

Fonte: Univesidade de Santiago de Compostela

O alumnado de 1º da ESO do IES As Telleiras desenvolveu «Coida a túa lingua», un xogo de cartas en galego sobre léxico sanitario para promover o uso da lingua entre a cativada e incrementar a súa presenza no ámbito médico. A iniciativa, que forma parte do proxecto de dinamización lingüística Xera, busca fomentar a creatividade e a implicación da mocidade de Narón para normalizar o galego en diversos sectores. Exemplares do xogo foron entregados ao persoal de Pediatría para distribuír entre as familias.O alumnado de 1º da ESO do IES As Telleiras desenvolveu «Coida a túa lingua», un xogo de cartas en galego sobre léxico sanitario para promover o uso

Fonte: Concello de Narón

O conselleiro de Cultura, Lingua e Xuventude, José López Campos, presentou o Misal Romano en lingua galega co que se pretende, resaltou, “potenciar o uso do idioma en ámbitos con gran peso na nosa sociedade como é o relixioso”. Así, a través dun convenio co Arcebispado de Santiago, editáronse 1.500 exemplares baixo o selo da editorial da Conferencia Episcopal Española que serán distribuídos a través das dioceses galegas.

Fonte: O Portal da Lingua Galega

Os conselleiros de Cultura, Lingua e Xuventude, José López Campos, e o de Sanidade, Antonio Gómez Caamaño, presentaron as novas medidas que a Xunta de Galicia porá en marcha nas vindeiras semanas para incentivar o uso da lingua galega no ámbito sanitario, entre as que destacan os cursos de galego que o Servizo Galego de Saúde incluirá en 2025 no seu plan de formación para mellorar a atención a pacientes galegofalantes. Esta é unha das  primeiras accións deseñadas polo Goberno galego ao abeiro do Pacto da Lingua coa finalidade de impulsar e prestixiar o idioma en diferentes ámbitos da nosa sociedade.

Fonte: O Portal da Lingua Galega

No cemiterio de Momán, no concello de Xermade, colocouse unha placa conmemorativa e substituíuse unha lápida escrita en castelán por outra en galego, homenaxeando a Jesús Paz Paz, veciño comprometido coa comunidade. O acto, que combinou poesía, música e reflexións sobre o uso do galego en todos os ámbitos, reafirmou o esforzo por recuperar espazos lingüísticos para esta lingua.

Fonte: La Voz de Galicia

Valentín García, acompañou á escritora Rosalía Morlán Vieites na presentación do libro infantil ilustrado O dragón Antón e o sapo Rosendo viaxan ata os faros, publicado por Edicións Fervenza. O acto, celebrado no Salón Teatro, contou co acompañamento musical da Coral de Habaneiras da Rocha Forte.

Fonte: O Portal da Lingua Galega

A Real Academia Galega culmina o ano dedicado a Luísa Villalta traducindo ao hindi oito poemas da súa obra Papagaio. A tradución, realizada por Vikash Kumar Singh, amplía o acceso á súa literatura a unha das maiores comunidades lingüísticas do mundo.

Fonte: Real Academia Galega

O conselleiro de Cultura, Lingua e Xuventude, José López Campos, participou na presentación das novidades de Xabarín.gal, unha nova plataforma de entretemento da CRTVG de contidos en galego dirixidos aos máis pequenos e pequenas coa que colabora o Goberno galego co obxecto, segundo salientou, “de incrementar o emprego da nosa lingua entre as xeracións máis novas”.

Fonte: O Portal da Lingua Galega

Este curso de iniciación á lingua galega, organizado pola UNED de Pontevedra en colaboración co Concello de Ribadumia, está dirixido a público xeral sen coñecementos previos de galego. As sesións, de carácter presencial, desenvolveranse entre os meses de xaneiro e maio de 2025.

Fonte: O Portal da Lingua Galega

O secretario xeral da Lingua, Valentín García, puxo en valor o novo recurso en liña do Centro Ramón Piñeiro para a Investigación en Humanidades que xeorreferencia os santuarios evocados nas Cantigas de Romaría, unha modalidade das coñecidas como Cantigas de Amigo.

Fonte: O Portal da Lingua Galega