O curso de escrita creativa de nivel 1, de 30 horas de duración, está dirixido a persoas que desexen iniciarse na escrita creativa en lingua galega e desenvolverase nos meses de febreiro e marzo de 2025 no Auditorio Mar de Vigo.

Fonte: Conselllo da Cultura Galega

O Consello da Cultura Galega lanza o «Foro participativo: un país coa súa lingua» para propoñer medidas que revitalicen o uso do galego. A iniciativa busca solucións prácticas e consensuadas baseadas nas fortalezas do idioma e está estruturada en seis mesas temáticas: educación e socialización; administración, xustiza e servizos públicos; sanidade, ciencia e servizos sociais; comunicación, cultura e acción exterior; economía, turismo e deporte; sociedade, crenzas e participación comunitaria. O proceso culminará en novembro cun documento final que orientará futuras accións para reverter a perda interxeracional de uso do galego.

Fonte: Consello da Cultura Galega

O informe Competencia e usos das linguas cooficiais en España. O galego en perspectiva comparada sinala que Galicia destaca en competencia e uso do galego fronte a outras comunidades con linguas cooficiais. Porén, alerta sobre unha preocupante perda interxeracional, cunha poboación máis nova que mostra os niveis máis baixos de frecuencia de uso e competencia, o que evidencia unha menor eficacia das políticas educativas en comparación co resto do Estado.

Fonte: Consello da Cultura Galega

Vilalba acollerá o I Campus de Regueifa RegueiNov+s – Regueifesta do 17 ao 19 de xaneiro, dirixido a mozos e mozas de entre 12 e 16 anos. Este evento busca fortalecer a regueifa como ferramenta cultural e lingüística a través de actividades como palestras, obradoiros..., que destacan o seu papel na normalización do galego.

Fonte: Neofalantes

A finais de 2024 chegaron ao mercado dous novos xogos de cartas en galego: Feminismos no Tempo, que engade unha terceira entrega sobre acontecementos do feminismo galego, e Máis Galiza no Tempo, centrado na historia de Galicia. Ambos os xogos inclúen 55 cartas e permiten combinar as novas barallas coas anteriores entregas de ambos os proxectos para crear unha experiencia de xogo unificada e enriquecida.

Fonte: Culturagalega

O CSIC publica un ano máis o Calendario científico escolar 2025, dispoñible para a súa descarga, xunto con outros recursos didácticos, en 11 idiomas (entre os que se atopa o galego) e mais en braille.

Fonte: Consello da Cultura Galega

A Secretaría Xeral de Medios publicou no DOG a convocatoria de subvencións para o ano 2025 dirixidas a empresas que realicen publicacións periódicas escritas integramente en galego.

Fonte: Consello da Cultura Galega

O Concello de Lugo envioulles carteis aos comercios locais para anunciar as rebaixas en galego, dentro das accións para promover o uso cotián desta lingua. A edil Maite Ferreiro salientou a urxencia de medidas efectivas ante o preocupante descenso do seu uso entre a xente nova. Presentouse tamén un decálogo para reverter esta situación e asegurar a supervivencia do galego.

Fonte: Aquí

A docente Tania Vázquez participa na iniciativa "Palabra e Memoria", impulsada polo xornalista David Canto, para analizar o uso do galego nas inscricións funerarias en Galicia e zonas galegofalantes de Castela e León e Asturias. O estudo preliminar revela un uso moi limitado do galego escrito, aínda que se observa un crecemento recente debido ao relevo xeracional das persoas alfabetizadas en galego tras a democracia.

Fonte: Xornal de Lemos

O IES Rafael Dieste da Coruña recibiu o prestixioso galardón de innovación educativa, cunha dotación de 10 000 euros. A súa iniciativa «Aquí tamén se fala galego», liderada por 200 centros e 20 000 estudantes, é a campaña de dinamización lingüística máis grande da historia, co apoio de persoeiros e entidades culturais e deportivas.

Fonte: Nós Diario