O secretario xeral da Lingua, Valentín García, participou no Monte do Gozo na presentación do Torneo 3x3, unha iniciativa que conxuga lingua, deporte, mocidade e tempo de lecer a través de diferentes propostas.

Fonte: O Portal da Lingua Galega

O Servizo de Normalización Lingüística da Universidade da Coruña ofrece axudas económicas e de asesoramento para a redacción e defensa en galego de teses, e traballos de fin de mestrado e de grao. Están dispoñibles para o alumnado das titulacións oficiais da UDC, agás para os estudos relacionados directamente coa lingua galega e portuguesa. O prazo para solicitar as axudas económicas remata o 31 de outubro de 2024.

Fonte: Consello da Cultura Galega

A Concellaría de Arquivos, Bibliotecas e Normalización Lingüística de Carballo busca revitalizar o proxecto "Carballo na memoria", iniciado en 2014 como un catálogo fotográfico. O obxectivo é amplialo para que se converta nun proxecto máis ambicioso de recuperación audiovisual, literaria, etnográfica e social. Así, en setembro, comezarán as Xornadas de microtoponimia, centradas na recuperación dos topónimos urbanos para coñecer mellor a historia local.

Fonte: Concello de Carballo

O secretario xeral da Lingua, Valentín García, presentou en Santiago a convocatoria do I Premio Xosé Neira Vilas de Literatura Xuvenil, organizado pola Fundación Neira Vilas e a Editorial Galaxia co apoio da Xunta de Galicia. Trátase dun certame cuxo obxectivo é renderlle homenaxe ao precursor do xénero de literatura infantil e xuvenil en galego.

Fonte: Xunta de Galicia

O conselleiro de Cultura, Lingua e Xuventude, José López Campos, animou o alumnado do Instituto Arxentino-Galego Santiago Apóstol de Bos Aires a manter vivo o legado de Galicia e dos seus devanceiros na Arxentina. Fíxoo aproveitando a viaxe de estudos que están a realizar, xunto co membro fundador deste centro, José Manuel Castelao Bragaña, á Comunidade para coñecer lugares de especial interese patrimonial e natural, así como as principais institucións culturais galegas.

Fonte: Xunta de Galicia         

O Xulgado Central do Contencioso-Administrativo de Madrid admitiu unha demanda da Mesa pola Normalización Lingüística contra a UNED, tras a negativa dun profesor a corrixir o exame de Bieito Lobeira, feito en galego. A demanda busca que se recoñeza o dereito do estudante a ser avaliado na lingua cooficial do territorio onde se examina. A UNED defende que o equipo docente non está capacitado para corrixir en idiomas distintos ao castelán, a pesar de que os seus estatutos comprometen a apoiar as linguas cooficiais.

Fonte: Galicia Confidencial

A primeira entrega de Heartstopper, de Alice Oseman, chega traducida ao galego por Nee Barros na editorial Xerais e está dispoñible nas librarías dende o 5 de setembro. Esta tradución busca dar visibilidade ao colectivo LGBTIQA+ en galego e ofrecer referentes nesta lingua en historias accesibles e para todas as idades.

Fonte: Faro de Vigo

Dous avogados de Lugo, Cristina Fernández Lago e Miguel Vieito, presentaron unha reclamación contra o Instituto Nacional da Seguridade Social tras negarlles atención en galego en consultas telefónicas. A súa reclamación, acollida á Lei de igualdade de tratamento, solicita sancións contra esta discriminación lingüística.

Fonte: Praza

Tamara Andrés e Oriana Méndez foron galardoadas co premio Plácido Castro de Tradución 2023 pola súa versión galega de As Iluminacións de Arthur Rimbaud, recoñecida pola súa complexidade e creatividade. Este galardón, que por primeira vez distingue unha tradución poética ao galego, conta cunha dotación de 3000 euros e entregarase no Día Internacional da Tradución.

Fonte: La Voz de Galicia

O Concello do Rosal, en colaboración coa Xunta de Galicia, lanza o I Concurso de Relato Curto, co obxectivo de promover o uso da lingua galega e a creatividade literaria entre a veciñanza, especialmente na mocidade. O certame, aberto a persoas non profesionais, dividirase en tres categorías segundo a idade e premiará os mellores relatos cun eBook Kindle e un lote de libros. As obras poderanse presentar ata o 1 de novembro de forma presencial ou ata o 2 de novembro a través da web municipal.

Fonte: Concello do Rosal