A Autoridade Unitaria de Carmarthenshire, no País de Gales, contará con dúas novas escolas de ensino primario que empregarán o modelo de inmersión en lingua galesa.

Fonte: Wales Online

O Tribunal do Traballo de Núremberg ditaminou que un traballador ou traballadora pode falar unha lingua diferente do alemán para comunicarse cos sindicatos e co resto de persoal dunha empresa, sempre que haxa un servizo de tradución adecuado.

Fonte: SHRM

A Mesa pola Normalización Lingüística e outras entidades da Rede Europea para a Igualdade das Linguas (ELEN, polas súas siglas en inglés) propuxéronlle á dirección xeral de Educación e Cultura da Comisión Europea a creación dunha figura de defensor ou defensora das linguas e un fondo europeo de linguas en perigo.

Fonte: Galicia Confidencial

O executivo estoniano pretende incrementar as axudas para a promoción do ensino en estoniano. Porén, o ministro de Administración Pública de Estonia, Jaak Aab, afirmou que non se está considerando o peche das escolas de inmersión en ruso que existen no país báltico.

Fonte: ERR

Unha enquisa realizada pola organización Conradh na Gaeilge de Irlanda revela que 1,5 millóns de irlandeses e irlandesas, un terzo da poboación, poden falar gaélico irlandés con certa seguridade. O estudo tamén mostra que case a metade das persoas entrevistadas escollería unha escola de inmersión en gaélico para a escolarización dos fillos ou fillas.

Fonte: Newstalk

O País de Gales celebra, como cada 5 de febreiro, o Día da Música en Galés que ten como obxectivo a promoción e defensa dos artistas musicais que se expresan nesta lingua. A edición deste ano terá lugar en formato virtual.

Fonte: In your area

O centro cultural brasileiro Memorial da América Latina lanzou o libro Línguas Ameríndias - ontem, hoje e amanhã que aborda o tema das linguas indíxenas dos pobos orixinarios do continente americano.

Fonte: ABC do ABC

Georgios Babiniotis, lingüista de referencia e antigo ministro de Educación de Grecia, mostrou a súa preocupación pola crecente irrupción de termos procedentes do inglés na lingua grega, sobre todo desde o inicio da pandemia a causa do coronavirus.

Fonte: The Guardian

O presidente de Turquía, Recep Tayyip Erdogan, anunciou que o 2021 vai ser celebrado como o ano do poeta Yunus Emre e o da lingua turca. A institución responsable da programación cultural para este fin vai ser o Ministerio de Cultura e Turismo.

Fonte: TRT

O guaraní, idioma oficial de Paraguai xunto ao español, contará co seu primeiro dicionario monolingüe. A obra lexicográfica terá unhas 2000 entradas.

Fonte: La Vanguardia