O alemán converteuse na segunda lingua máis demandada polos empresarios do Reino Unido ao subir un 11 % nas ofertas de emprego dos últimos tres anos.

Fonte: Independent

O Instituto Politécnico de Macau (IPM, polas súas siglas en portugués) estreou un sistema de tradución automática con recoñecemento de voz para a combinación lingüística chinés-portugués-inglés.

Fonte: RTP

Un estudo de investigación presentado por un catedrático da Universidade do País Vasco revelou que un total de 4800 xornalistas traballan exclusivamente nunha lingua minoritaria en Europa.

Fonte: La Vanguardia

Dúas localidades do leste e o centro da Bretaña inauguraron sinalización en lingua galó. Nunha delas a iniciativa inclúe tamén paneis informativos dentro do edificio da administración local.

Fonte: Jornalet

O Comité de Ministros do Consello de Europa publicou un relatorio sobre a situación das linguas minoritarias en Serbia e a aplicación da Carta Europea das Linguas Rexionais e Minoritarias. O ente europeo recoméndalle ao país balcánico que promova o uso destes idiomas no ensino e na Administración.

Fonte: Council of Europe

O presidente da República de Francia, Emmanuel Macron, rexeitou novamente a proposta do Goberno de Córsega dunha autonomía para a illa e a cooficialidade da lingua corsa.

Fonte: Nationalia 

O Estado francés desbloqueou unha partida orzamentaria de 100 000 euros para pór en funcionamento a Oficina Pública da Lingua Catalá na Cataluña do Norte no departamento dos Pireneos Orientais.

Fonte: L'Independant

O condado de Flintshire, no nordeste do País de Gales, decidiu incrementar os seus obxectivos no número de falantes de galés xa que, segundo algunhas fontes, non é o suficientemente ambicioso. Para conseguir a súa nova meta de 2500 novos falantes, o condado decidiu apoiarse no ensino de adultos e nas matrículas de escolares en centros de inmersión.

Fonte: Deeside

Unha investigación realizada pola oficina do comisario de Linguas Oficiais da República de Irlanda revelou que a canle pública de televisión RTÉ non está cumprindo os mínimos esixidos na programación de contidos en lingua vernácula.

Fonte: Independent

Un acordo entre Arabia Saudita e China permitirá que o país de Oriente Medio introduza o ensino do chinés en todas as etapas educativas, incluída a universitaria.

Fonte: Gulf