A Universidade de Lisboa presentou Evaristo.ai, o primeiro chatbot multilinguaxe, multimodal e multiheterónimo en portugués, baseado en IA aberta. Permite escoller o modelo e a personalidade. Ademais, garante a privacidade dos usuarios e non comercializa os seus datos.

Fonte: Business.it

O Parlamento de Escocia aprobou por unanimidade unha lei que fai oficiais o gaélico e a lingua esocesa ou scots, permitindo que as familias soliciten a escolarización nestas linguas. A norma busca frear o estado crítico do gaélico e prevé crear áreas de significación lingüística para protexer e expandir o seu uso.

Fonte: Diari de la Llengua

Efa Gruffudd Jones, comisaria da Lingua Galesa, propón nun manifesto cinco medidas clave para reforzar o uso do galés de cara ás eleccións de 2026. Entre elas destácanse a ampliación dos dereitos lingüísticos, a mellora da atención sanitaria en galés e a formación obrigatoria do profesorado nesta lingua.

Fonte: The Pembrokeshire Herald

O Centro de Linguas BabeliUM da Universidade do Miño organiza o programa “Verán das Linguas”, con cursos de alemán, español, francés, inglés, italiano e portugués para persoas estranxeiras. As inscricións están abertas ata o 23 de xuño, tanto en liña como presencial no campus de Gualtar, en Braga.

Fonte: O Amarense

Profesionais daneses sinalan nun informe que a falta de fluidez en danés é o principal obstáculo para a contratación de traballadores internacionais nas empresas danesas, mesmo en sectores onde inglés é lingua habitual.

Fonte: The Copenhagen Post

Portugal reforma a súa lei migratoria para ampliar os dereitos dos inmigrantes cualificados de países lusófonos. A nova norma facilita o acceso á residencia e ao emprego e reforza a cidadanía lingüística da Comunidade de Países de Lingua Portuguesa (CPLP), equiparando condicións mediante o recoñecemento da lingua e das cualificacións profesionais.

Fonte: Público

Ucraína anunciou o desenvolvemento do seu primeiro modelo de linguaxe amplo (LLM) en ucraíno, presentado polo Ministerio de Transformación Dixital e Kyivstar, a principal empresa de telecomunicacións do país.

Fonte: Capacity Media

A Universidade de Nottingham anunciou que reducirá o persoal docente do seu centro de linguas, o que suscitou críticas por pór en perigo o seu carácter global.

Fonte: BBC

A aprobación da Lei de lingua propia e oficial en Andorra propiciou un claro incremento do número de persoas nos cursos e centros de autoaprendizaxe de catalán, así como no que atinxe ás parellas lingüísticas.

Fonte: Diari de la Llengua

A rede de escolas en catalán La Bressola, da Cataluña Norte, asegurou a súa continuidade para o próximo curso grazas ás achegas extraordinarias de administracións, institucións e a sociedade civil. En total recadáronse 710 000 euros, o que permitiu que o prezo da matrícula aumentase tan só un 10 %.

Fonte: Diari de la Llengua