Saíu do prelo o último número das famosas aventuras de Astérix e Obélix, Astérix en Lusitania, que terá tradución nun total de 19 linguas.

Fonte: RTÉ

O mandatario indonesio, Prabowo Subianto, declarou que a lingua portuguesa será incluída como prioridade no sistema educativo do seu país, tanto nas escolas como nas universidades, co obxectivo de fortalecer a cooperación entre Indonesia e o Brasil.

Fonte: Notícias ao Minuto

Varios dirixentes en Letonia expresaron preocupación polo aumento de anglicismos no uso diario da lingua estatal e reclamaron que se fomente o respecto e o uso habitual da lingua letoa para garantir a súa vitalidade e identidade cultural.

Fonte: Baltic News Network

Unha coalición de socios africanos e internacionais puxo en marcha unha iniciativa para desenvolver modelos de linguaxe ampla africanos e inclusivos, co obxectivo de reforzar o ecosistema de intelixencia artificial do continente.

Fonte: Business Insider Africa

O líder dos conservadores galeses, Darren Millar, anunciou que, se o seu partido chega ao goberno de Gales, obrigará todos os concellos a ofreceren educación tanto en inglés como en galés. A proposta xorde tras o plan da municipalidade de Gwynedd de reducir a ensinanza en inglés na maioría dos seus institutos.

Fonte: BBC

Un estudo revela que só arredor do 20 % dos centros educativos en Flandres aplica programas bilingües ou de materias impartidas noutras linguas. As escolas con alumnado máis vulnerable son as que menos oportunidades ofrecen neste ámbito, o que podería aumentar as desigualdades educativas.

Fonte: Belga News Agency

O executivo español decidiu non continuar, polo momento, co proceso para que o catalán, galego e éuscaro sexan recoñecidos como lingua oficial da Unión Europea. O motivo é que aínda non existe consenso entre os 27 países, polo que o goberno prefire esperar a conseguir a unanimidade antes de retomar a iniciativa.

Fonte: Catalan News

O Instituto da Lingua Estoniana está a desenvolver Keelerkratt, unha ferramenta de intelixencia artificial destinada a axudar o alumnado de familias rusófonas a mellorar o seu dominio do estoniano. A aplicación estará dispoñible de forma gratuíta para todas as persoas interesadas.

Fonte: ERR

O Goberno de Flandres presentou un plan para reforzar o ensino do neerlandés entre persoas adultas. Co nome "Nederlands werkt" (“O neerlandés funciona!”), o programa inclúe oito medidas concretas destinadas a mellorar a calidade e a accesibilidade das clases de neerlandés como segunda lingua, especialmente para persoas que acaban de chegar ao país e pais ou nais con fillos en idade escolar.

Fonte: Belga News Agency

O Concello de Cascais presentou o novo Centro da Lingua e do Mar, un espazo físico e dixital que promove a lingua portuguesa e o patrimonio marítimo como sinais de identidade. Localizado no Forte de Santo António da Barra, o proxecto pretende unir cultura, ciencia e cooperación internacional, consolidando o papel de Cascais como referente da lusofonía e da sustentabilidade.

Fonte: Câmara Municipal de Cascais