Con motivo do Día Mundial da Lingua Portuguesa, o Estudo Autónomo da Dirección Xeral de Educación de Portugal publicou tres eBooks didácticos gratuítos para fomentar a aprendizaxe autónoma e lúdica do portugués. Os títulos dispoñibles son: Português num minuto – dúvidas com verbos (Vol. I), Português num minuto – pares duvidosos (Vol. II) e Missão: aprender português. Estes recursos inclúen contidos audiovisuais e están deseñados para promover a reflexión lingüística e a competencia comunicativa, sendo tamén útiles para estudantes estranxeiros.

Fonte: Direção-Geral de Educação

Ffilm Cymru Wales abriu a segunda convocatoria do fondo Sinema Cymru, destinado a apoiar o desenvolvemento de longametraxes en lingua galesa. O programa busca proxectos con potencial para o gran público e fai parte dos esforzos para revitalizar e promover a cultura e lingua galesas a través do cinema.

Fonte: South Wales Angus

O 5 de maio de 2025, San Tomé, capital de San Tomé e Príncipe, acolleu a sesión solemne do Día Mundial da Lingua Portuguesa e da Cultura na CPLP. O evento contou con intervencións institucionais, actuacións do músico brasileiro Vinícios Terra, danzas tradicionais a cargo do grupo Legi Tela e un desfile de moda da deseñadora Antonieta Almeida.

Fonte: Forbes

O Public Records Office de Irlanda do Norte acolle por primeira vez unha exposición en lingua irlandesa. Mná na hAthbheochana narra a historia das mulleres que foron clave no renacemento da lingua irlandesa, impulsando a creación da primeira Gaeltacht urbana e da primeira escola en inmersión lingüística nos anos 60 e 70.

Fonte: BBC

Duolingo duplicou a súa oferta educativa cun total de 148 novos cursos, creados coa axuda de intelixencia artificial xerativa. Os sete idiomas máis populares poderán agora aprenderse nas 28 linguas dispoñibles na plataforma, ampliando así o acceso á aprendizaxe para máis de mil millóns de persoas usuarias potenciais.

Fonte: Veja

A Embaixada de Alemaña en Bucarest anunciou a asignación de 495 000 euros destinados a apoiar o ensino da lingua alemá en Romanía. Con esta iniciativa, preténdese reforzar a educación en alemán no seo da comunidade xermanófona do país.

Fonte: Romania Insider

O 5 de maio, a Unesco conmemora o quinto aniversario do Día Mundial da Lingua Portuguesa, instaurado no ano 2019. A efeméride será celebrada con múltiples actividades culturais e educativas en diversos países, poñendo en valor o papel do portugués como ferramenta de cohesión, diálogo intercultural e expresión da diversidade global.

Fonte: e-GLOBAL

Por primeira vez, a obra clásica de J.R.R. Tolkien O Hobbit foi traducida ao gaélico escocés baixo o título A' Hobat. Esta edición, publicada pola editorial Evertype con sede en Dundee, contou coa tradución do profesor Moray Watson da Universidade de Aberdeen e inclúe as ilustracións orixinais de Tolkien.

Fonte: The National

No inicio deste ano, a plataforma de aprendizaxe de idiomas Rosetta Stone rexistrou un aumento do 40 % no número de usuarios británicos, sendo o español o idioma máis popular. Este incremento suxire un renovado interese por aprender novas linguas no Reino Unido.

Fonte: The Yorkshire Post

O sociólogo e exministro de Educación guineano Dautarim da Costa expresa preocupación ante a posibilidade de que Senegal, país veciño con maior poboación e investimentos en educación, supere a Guinea-Bissau en número de falantes de portugués. Esta situación podería afectar á soberanía lingüística guineana.

Fonte: RFI