En 2012, o inglés foi a lingua máis comunmente estudada polo alumnado europeo de ensino secundario, cun índice do 97,1 %, moi por diante do francés (34,1 %), o alemán (22,1 %) e o español (12,2 %). A importancia do inglés na Europa dos 28 queda tamén confirmada ao ser a primeira lingua estranxeira de referencia para o ensino en case todos os estados.

Fonte: Prague Post

Aínda que goza do mesmo status respecto ao inglés e o francés en Nunavut, territorio autónomo do Canadá, a lingua inuit (ou inuktitut) está nunha "situación de inferioridade" respecto ás outras dúas, declarou a comisaria de linguas de Nunavut, Sandra Inutiq.

Fonte: Nunatsiaq Online

A Universidade de Luxemburgo iniciou un estudo que permitirá investigar a importancia da lingua materna na aprendizaxe de linguas estranxeiras e no éxito escolar dos emigrantes portugueses. O estudo contará coa participación dunha centena de nenos e nenas portugueses que viven no país.

Fonte: RTP

O Instituto Portugués do Oriente (IPOR) asinou un acordo de cooperación coa escola secundaria da cidade continental chinesa de Shenyang para o ensino da lingua e cultura portuguesas naquela institución.

Fonte: Mundo Português

O Goberno estoniano prevé a creación dunha canle de televisión en lingua rusa para dentro dun ano. O novo espazo formará parte de ERR, a empresa pública de radiodifusión de Estonia.

Fonte: Baltic Business News

A medida que se fortalecen os vínculos entre China e o Brasil, cada vez máis brasileiros se interesan pola lingua e cultura chinesas. Malia as dificultades, todos os indicios apuntan a que a lingua asiática está entrando nun período próspero no Brasil, despois da recente creación da primeira escola bilingüe portugués-chinés no estado de Río de Janeiro.

Fonte: China Daily

Nace un bebé en Lisboa que promete facer historia ao converterse na primeira persoa que recibe oficialmente un nome propio mirandés, polo menos desde o recoñecemento desta lingua como segundo idioma oficial de Portugal, hai agora 15 anos. Chámase Lhuzie e a atribución do seu nome pode abrir as portas a quen queira dar nomes mirandeses aos fillos.

Fonte: Jornali

A aposta polo turismo e o ensino do portugués son dúas maneiras de afondar as “sólidas relacións” entre Portugal e Tunisia, afirmou o secretario de Estado de Asuntos Exteriores tunisiano. No ámbito estritamente lingüístico, o Goberno do país africano declarou que pretende introducir o ensino do portugués na educación secundaria.

Fonte: Mundo Português

O hospital Ysbyty Cwm Rhondda designou unha sala específica para ofrecer asistencia médica aos pacientes que queiran expresarse en lingua galesa. Trátase dunha medida dun proxecto piloto que se está a aplicar no val de Rhondda, no sur de Gales.

Fonte: Wales Online

A lingua portuguesa é a quinta máis usada en internet, nunha lista das dez máis empregadas divulgada pola empresa estatística Internet World Stats. A lingua inglesa continúa no primeiro lugar e o chinés ocupa a segunda posición mais con menor distancia respecto á última avaliación. Na terceira e cuarta posicións están o español e o árabe. Esta última protagonizou o maior incremento desde o ano 2000.

Fonte: Público