O ministro de Educación de Malta, Evarist Bartolo, está iniciando unha campaña para manter e mellorar os niveis de dominio da lingua inglesa no país insular. O programa inclúe unha revisión dos niveis de inglés do alumnado das escolas.

Fonte: Times of Malta

O ministro de Educación de Angola, Pinda Simão, declarou que unha das grandes limitacións do sistema de ensino en Angola é o fraco dominio da lingua portuguesa por parte do alumando e mesmo por algúns docentes.

Fonte: África 21 Digital

Unha empresa brasileira de nova creación, Backpacker, lanzou un xogo en liña onde os usuarios poden aprender inglés por medio de éxitos musicais.

Fonte: Correio

A ministra responsable de asuntos francófonos do estado canadense de Ontario, Madeleine Meilleur, anunciou que unha plataforma multimedia de lingua francesa estará á disposición do alumnado de francés como segunda lingua.

Fonte: La Presse

A Universidade de Macau foi elixida para a presidencia da Asociación de Universidades de Lingua Portuguesa (AULP) para o trienio 2014-2017, declarou á Axencia Lusa o vicerreitor Rui Martins.

Fonte: Notícias ao Minuto

A Escola de Antropoloxía e Historia do Norte de México (EAHNM), con sede na cidade de Chihuahua, impulsa accións de investigación, documentación, valoración e fortalecemento das linguas indíxenas do norte do país, orientadas a propiciar a súa revitalización, ante o proceso de desprazamento que sufriron historicamente.

Fonte: El Sol de México

A deputada de Alternativa Galega de Esquerda, Lidia Senra, tivo que empregar o castelán na Comisión de Agricultura da Eurocámara para que se recollese na acta a súa intervención.

Fonte: La Voz de Galicia

A Unión Democrática Maxiar de Romanía (UDMR, principal partido da comunidade húngara de Transilvania) propuxo a creación dun consello e un goberno propios co húngaro e o romanés como linguas oficiais. Porén, o primeiro ministro de Romanía declarou que non está a favor "de ningún tipo de autonomía" territorial no país.

Fonte: Nationalia

Concertos multilingües en Zagreb e Vilnius, unha exposición en París sobre a tradución da Odisea de Homero e minicursos de linguas nas bibliotecas berlinesas son algunhas das iniciativas programadas para celebrar a nova edición do Día Europeo das Linguas.

Fonte: West

O inglés é a lingua estranxeira máis aprendida na Unión Europea. Máis do 96 % do alumnado está a aprender a lingua de Shakespeare. A continuación, seguen o francés, o alemán e o español. En Portugal, a aprendizaxe do inglés continúa a dominar, mais cun descenso significativo, e aumenta o número de estudantes de español.

Fonte: Jornal de Negócios