A corporación pública de radiodifusión de Irlanda, RTÉ, anunciou que os sitios web RTÉ.ie e RTÉ News Now App contarán agora por primeira vez con contidos de noticias nacionais, internacionais e rexionais en lingua irlandesa.

Fonte: The Irish Times

Seis funcionarios diplomáticos de Guinea Ecuatorial concluíron en Portugal un curso intensivo de lingua e cultura portuguesas no marco dun protocolo de cooperación asinado entre os gobernos dos dous países.

Fonte: Portugal Digital

Tres escolas privadas de ensino primario ofrecerán a partir deste curso académico clases en lingua kurda nas provincias turcas de Diyarbakır, Şırnak e Hakkari.

Fonte: Today's Zaman

O Goberno federal de Australia lanzará un programa piloto de 9,8 millóns de dólares australianos para animar os nenos de catro anos a aprender francés, árabe, indonesio, xaponés ou chinés mandarín.

Fonte: News

A Comisión Técnica do Inventario Nacional da Diversidade Lingüística do Brasil (INDL), pertencente ao Instituto de Patrimonio Histórico e Artístico Nacional, incluíu dúas linguas indíxenas (o asurini da terra de Trocará e o guaraní mbyá) na lista de referencias culturais brasileiras.

Fonte: EBC

Os habitantes do cantón suízo de Lucerna pronunciaranse sobre a supresión dunha lingua estranxeira da escola primaria. Representantes de diferentes partidos políticos e a asociación de docentes do cantón recolleron máis de 7000 sinaturas para apoiar a iniciativa.

Fonte: RTS

Membros do colectivo en defensa da lingua bretoa Ai'ta devolveron simbolicamente ao Consello Xeral do Departamento de Morbihan unha centena de sinais viarios escritos unicamente en francés para demandar "unha verdadeira política lingüística para a lingua bretoa".

Fonte: Le Télégramme

A Academia Brasileira de Letras (ABL) lanzou unha aplicación gratuíta de consulta do Vocabulario Ortográfico da Lingua Portuguesa (Volp). Os usuarios desta aplicación para teléfonos intelixentes e tablets poderán consultar os case 400 000 termos que xa seguen as novas regras previstas no Acordo Ortográfico.

Fonte: O Povo

O proxecto para a documentación da lingua palikur da profesora brasileira Elissandra Barros recibirá financiamento dun programa de linguas ameazadas da Universidade de Londres. Ata 2015, a profesora documentará a cultura e a lingua falada polos indíxenas palikur da rexión norte do estado de Amapá.

Fonte: Globo

O ministro de Educación angolano, Pinda Simão, garantiu que o país "está a traballar" sobre o novo acordo ortográfico da lingua portuguesa, que Angola aínda non subscribiu, e que no "debido momento" será tomada unha decisión ao respecto.

Fonte: A Bola