O Reino Unido está a piques de aplicar unha importante modificación no plan de estudos do ensino público. Entre outras moitas novidades, a partir do vindeiro curso, o estudo de linguas estranxeiras pasará a ser obrigatorio para o alumnado de educación primaria.

Fonte: Mail Online

Un grupo de lingüistas alertou que as linguas indíxenas de Nova Zelandia (linguas do Pacífico e maorí) están ameazadas polo descenso do número de falantes nativos. Algunhas delas poderían desaparecer nesta xeración se o Goberno neozelandés non fai nada para impedilo.

Fonte: Pacific Scoop

O organismo quebequés "Impératif français" aproveitou a festa do traballo para lanzar a súa campaña anual "Eu traballo en francés". Por medio desta iniciativa difundiranse espazos publicitarios na radio e na televisión para instar os gobernos e os empresarios a fomentar o francés no ámbito do traballo no Quebec.

Fonte: La Presse

Activistas a prol da lingua galesa alertaron que o municipio de Swansea non está a empregar suficientemente o galés nas redes sociais e denuncian que non se está a cumprir o Plan da Lingua Galesa aprobado pola entidade local.

Fonte: South Wales Evening Post

O novo sistema operativo de Apple, OS X Yosemite, permitiralles aos usuarios escoller o napolitano e o siciliano como linguas para os terminais, despois de que a Unesco aceptase estes idiomas como linguas maternas.

Fonte: Il Messaggero

Plataforma9 é un novo portal cultural do mundo lusófono que pretende converterse “no sitio de referencia para todas as persoas e institucións interesadas en recibir información fiable e actualizada de todo o que está a acontecer e é preciso saber na cultura e na investigación en e de lingua portuguesa”. No nome de Plataforma9 insírense os nove países da lusofonía: Portugal, Brasil, Angola, Mozambique, Guinea-Bisau, San Tomé e Príncipe, Cabo Verde, Galicia e Timor.

Fonte: Fundação Calouste Gulbenkian

Un idioma orixinario do norte de Alemaña, o pomerano, continúa vivo no interior do estado brasileiro de Espírito Santo, onde é lingua materna de moitas persoas. A elaboración dun dicionario e a impartición de clases nesta lingua inclúense entre as iniciativas que contribúen á súa preservación.

Fonte: DW

Un relatorio elaborado pola Universidade de Cambridge revela que as zonas cun índice de desenvolvemento económico máis elevado son as que rexistran maior perda de diversidade lingüística. Segunda a investigadora do estudo, unha das razóns está en que "moitos falantes se ven forzados a adoptar a lingua dominante se non queren verse relegados económica e politicamente".

Fonte: Aljazeera

O goberno da cidade luxemburguesa de Differdange decidiu pechar a oferta de cursos de lingua portuguesa e deixará máis de 300 estudantes sen clases de portugués. Membros da comunidade portuguesa de Luxemburgo lamentaron esta medida que achacan á necesidade imposta polo Instituto Camões de que os grupos teñan agora un mínimo de dez alumnos.

Fonte: Mundo português

O guaná, con tan só catro falantes, é unha das linguas indíxenas que corren perigo de desaparecer en Paraguai. O país suramericano afronta o desafío de preservar os seus 20 idiomas orixinarios e non quere perder parte dunha cultura ancestral que historicamente foi deixada de lado polas súas institucións.

Fonte: Yahoo Notícias