Unha sondaxe realizada en Luxemburgo mostrou diferentes opinións sobre o exame de luxemburgués que se está a realizar a persoas que queiran optar á nacionalidade luxemburguesa. Para os luxemburgueses o exame é demasiado fácil mentres que os entrevistados estranxeiros consideran que o nivel da proba é demasiado alto.

Fonte: Wort.lu

O Goberno de Paraguai asinou un acordo co lingüista estadounidense Nicolás Gynan para facer labores de documentación que permitan salvar a lingua guaná, falada actualmente só por catro anciás.

Fonte: Terra

A Oficina Pública da Lingua Occitana lanzou o Premio Jan Moreu co fin de premiar proxectos que traten o tema da transmisión e utilización do occitano.

Fonte: Jornalet

A agrupación Iniciativa por Occitania convocou unha manifestación para defender o ensino do occitano en Provenza. O próximo curso académico suprimiranse os cursos desta lingua en institutos e escolas.

Fonte: Nationalia

A comisión de cultura do Consello Rexional de Sardeña está elaborando unha proposta de lei que pretende introducir o ensino da lingua e literatura sardas en todos os niveis de ensino.

Fonte: Orizzonte Scuola

O director de linguas indíxenas do Ministerio de Cultura do Perú declarou que nos últimos anos desapareceron no país andino 37 idiomas orixinarios. Moitos indíxenas denuncian a día de hoxe a imposibilidade de vivir nas súas linguas.

Fonte: Crónica Viva

Unha nova escola pública abrirá as súas portas en Differdange (Luxemburgo) coa posibilidade de impartir lingua portuguesa. Ata agora os pais do alumnado non manifestaron demasiado interese en que os seus fillos aprendan este idioma.

Fonte: Dnoticias.pt

O Europarlamento acollerá a conferencia co título "Respecto polos dereitos lingüísticos? As discriminacións lingüísticas na Unión Europea", organizada por grupos parlamentarios da Alianza Libre Europea, Os Verdes e a Esquerda Unida Europea en colaboración coa Rede Europea para a Igualdade das Linguas (ELEN). Este encontro contará coa participación d'A Mesa pola Normalización Lingüística que exporá o informe do servizo "Liña do Galego".

Fonte: Sermos Galiza

As universidades británicas están comezando a ofrecer cursos de nivel inicial de linguas estranxeiras como o francés, o alemán e o español para contrarrestar o declive no ensino destes idiomas en secundaria.

Fonte: The Guardian

O presidente da cámara municipal de Miranda do Douro, Artur Nunes, mostrouse disposto a colaborar co Principado de Asturias no ámbito da investigación lingüística, xa que os idiomas mirandés e asturiano teñen aspectos comúns.

Fonte: RTP