Os representantes da Rede Europea para a Igualdade das Linguas (ELEN, polas súas siglas en inglés) expuxeron no Consello Económico e Social das Nacións Unidas en Xenebra a cuestión da discriminación que sofren os falantes de linguas rexionais en Francia.

Fonte: Le Télégramme

Vinte editoriais que publican en lingua bretoa puxéronse de acordo para crear unha plataforma unitaria na rede. O novo sitio levará o nome de Lenn (ler, en bretón) e pretende ser unha ferramenta de promoción e expansión desta lingua celta que conta con 210 000 falantes.

Fonte: Sermos Galiza

O ministro de Educación de Timor Leste, António da Conceição, defendeu a necesidade de eliminar a percepción que existe no país de que o portugués é un idioma difícil de aprender, cando unha parte importante do vocabulario que se usa en tetún provén desta lingua. O ministro declarou ademais que é necesario facer máis no mundo para a promoción e a internacionalización da lingua portuguesa.

Fonte: Observador

A Unión Europea quere contratar nos próximos anos un total de 180 lingüistas de gaélico irlandés para diferentes postos en oficinas de Bruxelas e Luxemburgo. As institucións europeas anunciaron xa un proceso selectivo para escoller os 62 primeiros tradutores que falen esta lingua.

Fonte: Business World

O presidente de Timor Leste, Adérito Hugo da Costa, defendeu a importancia de aproveitar as vantaxes e os intereses económicos de aprender portugués e declarou que o país debe multiplicar por dous ou tres o número de formadores nesta lingua.

Fonte: RTP Notícias

Con motivo da súa visita a París para celebrar o 10 de xuño, Día das Comunidades Portuguesas, o primeiro ministro de Portugal, António Costa, defendeu a necesidade de promover e incrementar a presenza do portugués en Francia e anunciou a posibilidade de que docentes portugueses poidan atopar traballo como formadores desta lingua no país galo.

Fonte: Renascença

As declaracións do primeiro ministro de Xamaica sobre a posibilidade de converter o español en lingua oficial sumiu o país caribeño nun profundo debate sobre se o crioulo debería recibir tamén o mesmo status.

Fonte: Nationalia

Dous hospitais de Bélxica introduciron robots que poden comunicar en 20 linguas diferentes. Polo momento, os humanoides realizan unicamente servizos de recepción de pacientes.

Fonte: Numerama

TalkTalkBnb é unha nova rede social que pon en contacto persoas que desexan aprender unha lingua estranxeira ofrecendo en troco aloxamento gratuíto.

Fonte: RTL2

O líder da Cámara dos Comúns do Parlamento do Reino Unido, o conservador Chris Grayling, rexeitou varias peticións que reclamaban a posibilidade de empregar o galés nos discursos orais.

Fonte: BBC