O club de fútbol do Manchester City presentou unha conta oficial en lingua catalá que conta xa con máis de 10 000 seguidores.

Fonte: Jornalet

O val de Swansea conta xa cun novo centro da lingua galesa que se dedicará a actividades educativas e de ensino do galés, así como á dinamización cultural. O centro recibiu financiamento da Universidade de Swansea e do Goberno do País de Gales.

Fonte: South Wales Evening Post

Emisoras públicas de televisión dos estados que integran a Comunidade de Países de Lingua Portuguesa estrean Programa Nossa Língua, un espazo televisivo que retransmitirá documentais de todos os países lusófonos. O obxectivo non é outro que o intercambio cultural en lingua portuguesa.

Fonte: Mundo Lusíada

O Goberno alemán acaba de aprobar novas leis que obrigan os demandantes de asilo a facer cursos de lingua e integración para poder traballar e ficar no país.

Fonte: The Telegraph

O ministro de Educación do cantón de fala italiana de Ticino sente que, na problemática sobre que lingua ou linguas se deben ensinar nas escolas, Suíza esquece con frecuencia que o italiano é a terceira lingua nacional e que, por tanto, debe estar ao mesmo nivel que o alemán e o francés.

Fonte: The Local

A escritora británica de orixe ghanesa, Sharon Dodua Otoo, acaba de gañar o premio de narrativa de ficción Ingeborg Bachman, un dos máis importantes da literatura en lingua alemá, pola súa obra curta Herr Gröttrup setzt sich hin.

Fonte: The Guardian

Unha análise recente estima que 88 das 90 linguas indíxenas do Canadá poderían desaparecer se non se toman as estratexias adecuadas para revitalizalas.

Fonte: Nationalia

A organización non gobernamental Save the Children abriu unha nova liña de atención telefónica que dará apoio e orientación a menores en italiano, árabe, inglés, francés, tigriña, somalí e parsi.

Fonte: Stranieri in Italia

A localidade francesa de Saint-Girons (Sant Guironç, en occitano) inaugurará o curso que vén unha escola de fala occitana (Calandreta de Coserans) que conta de momento con dez alumnos inscritos.

Fonte: Jornalet

O ministro de Asuntos Exteriores de Portugal, Augusto Santos Silva, destacou o potencial de crecemento económico da Comunidade de Países de Lingua Portuguesa e vaticinou unha forte expansión para o portugués.

Fonte: Observador