Mundo
Unhas 2500 linguas encóntranse en perigo por culpa dos smartphones
Das máis de 7000 linguas que se falan no mundo, arredor de 2500 encóntranse en perigo e non sobrevivirán á era dixital. É o que se coñece como "morte dixital dos idiomas".
Fonte: BBC
Intelectuais lanzan un manifesto a prol do uso da lingua común en Bosnia
O uso de tres idiomas oficiais (serbio, croata e bosníaco) percíbese como unha forma de incentivar o nacionalismo por parte dun grupo de intelectuais que asinaron un manifesto no que afirman que falan “unha lingua común”.
Fonte: El Telégrafo
Investigadores e empresas únense para ofrecer tecnoloxía en suahili
O suahili, con 100 millóns de falantes, é, despois do árabe, o segundo idioma máis falado en África. A pesar diso, moitos servizos tecnolóxicos, como o recoñecemento automático da fala, non están dispoñibles nesta lingua.
Fonte: Global Voices
Unha lei busca en Chile o recoñecemento dos dereitos lingüísticos como parte dos dereitos humanos
A Lei de dereitos lingüísticos dos pobos indíxenas en Chile é unha iniciativa que parte da sociedade civil indíxena e conta co apoio da Universidade de Santiago, sede de tres Congresos de Lingua que deron orixe e seguimento ao proxecto de lei.
Fonte: El Mostrador
Un total de 49 países do mundo celebra o Día da Lingua Portuguesa
O Instituto Camões anunciou que 49 estados de todo o mundo celebrarán este ano o Día da Lingua Portuguesa con iniciativas culturais como coloquios, conferencias e encontros literarios co fin de pór en valor o portugués como lingua de prestixio internacional.
Fonte: Diário de Notícias
Un estudo revela que as persoas bilingües teñen unha noción do tempo diferente
Un estudo elaborado por investigadores das universidades de Lancaster e Estocolmo revelou que as persoas que falan dúas linguas poden ter unha noción moi variada do tempo xa que as linguas abordan a temporalidade de xeito diferente.
Fonte: Independent
O presidente de Timor Leste apoia unha política clara de promoción da lingua portuguesa
O presidente de Timor Leste, Taur Matan Ruak, defendeu que o país asiático debe investir máis esforzos na adopción dunha política que promocione claramente a lingua portuguesa, sobre todo no ámbito educativo.
Fonte: Diário de Notícias
O condado galés de Gwent non conta con suficientes profesores de galés
O condado galés de Gwent, no sur do País de Gales, non conta con suficiente profesorado para facer fronte á crecente demanda de clases de lingua galesa para adultos.
Fonte: South Wales Argus
O presidente da Comisión Europea declara que o inglés perde importancia na UE co Brexit
O presidente da Comisión Europea, Jean-Claude Juncker, declarou nunha conferencia celebrada en Italia que o inglés está a perder peso no conxunto das linguas da Unión Europea pola decisión do Reino Unido de abandonar o grupo de 28 estados.
Fonte: BBC
Israel quere que o árabe deixe de ser lingua oficial
Un grupo de ministros israelís aprobou o borrador dunha polémica lei que pretende rebaixar o status actual do árabe como segunda lingua oficial no país.
Fonte: Clarín
Boletín
Subscríbase ao boletín
