O estudo das linguas estranxeiras diferentes ao inglés, como o sueco, o alemán e o francés, segue diminuíndo en Finlandia, tal como mostran as baixas matrículas que se rexistran no ensino secundario do país nórdico.

Fonte: YLE

No marco do seu programa de promoción da lingua galesa para acadar o millón de falantes en 2050, o Goberno do País de Gales destinará cartos públicos ao fomento da aprendizaxe do galés no ámbito laboral entre a poboación adulta.

Fonte: FreePress

A Cámara de Senadores subscribiu un convenio coa Fundación Yvy Marae’y co obxectivo de incorporar a utilización do guaraní nas actividades lexislativas, así como en documentos e informacións da Cámara Alta. Con este acordo preténdese conseguir un uso equilibrado e equitativo das dúas linguas oficiais de Paraguai: o castelán e o guaraní.

Fonte: Itapúa Noticias

O alumnado universitario dinamarqués ten cada vez máis materias en inglés. De acordo coa oficina estatística do país escandinavo, un 43 % dos universitarios e universitarias recibe xa as clases nesta lingua.

Fonte: CPH Posto Online

Representantes do Ministerio de Asuntos Exteriores de Rusia informaron de que a nova lei do Goberno de Letonia que obriga as escolas das minorías lingüísticas a instruír en letón podería empeorar as relacións bilaterais entre os dous países.

Fonte: The Baltic Times

A Organización dos Estados Iberoamericanos e os Institutos Politécnicos asinaron un acordo para reforzar a lingua portuguesa no espazo iberoamericano.

Fonte: Diário de Notícias

Moitas das 364 linguas que se falan en México están en risco de desaparecer, razón pola que se están a pór en marcha numerosas iniciativas destinadas á súa preservación. Desde o ámbito tecnolóxico deseñaron unha aplicación para aprender a falar e escribir náhuatl. E desde o musical, o grupo Rockercoatl distínguese por interpretar música tamén nesta lingua.

Fonte: La Vanguardia

As cidades libias con poboación bérber queren aprobar unha ordenanza municipal para que o tamazight poida empregarse nos sinais e edificios públicos e privados. Ata o momento, a cidade de Zuwara aplicou xa esta norma.

Fonte: The Libya Observer

O presidente de Letonia, Raimonds Vējonis, aprobou a norma promulgada previamente polo Parlamento que introduce o ensino paulatino en letón nas escolas das minorías lingüísticas.

Fonte: TASS

A comisaria da Lingua Galesa, Meri Huws, recoñeceu que a lei en materia de lingua será de difícil aplicación nas universidades galesas. De acordo coa nova norma, todos os centros universitarios deben poder ofrecer docencia e materiais en galés nos mesmos niveis que o fan en inglés.

Fonte: BBC