O Consello de Europa lamentou que o Goberno do Reino Unido non crease o consenso necesario para aprobar a Lei da Lingua Irlandesa que garanta dereitos para os falantes de gaélico en Irlanda do Norte.

Fonte: Irish News

O ministro de Educación de Portugal, Tiago Brandão, informou de que nove mil alumnos do ensino básico de Francia están a aprender portugués neste ano lectivo grazas a un acordo asinado entre os ministerios de Educación dos dous países.

Fonte: Observador

O Goberno vasco e o Organismo Público da Lingua Vasca renovaron o seu acordo de colaboración en materia de éuscaro co que pretenden fomentar o coñecemento, emprego e presenza desta lingua en Iparralde.

Fonte: El Diario Vasco

A Comisión Europea rexistrará a iniciativa cidadá "Minority SafePack" que avoga pola protección das persoas que pertencen a minorías lingüísticas co obxectivo de promover e protexer a diversidade lingüística da Unión Europea.

Fonte: La Vanguardia

Segundo a lexislación aprobada en 2008, o Goberno da provincia canadense de Nunavut debía ofrecer antes de 2019 un ensino completamente bilingüe en inglés e inuit en todas as escolas públicas. O ministro de Educación declarou que esta medida non se poderá implementar ata o 2029, o que podería supor un risco para a xa ameazada lingua nativa.

Fonte: CBC

A Universidade de Hull, no norte de Inglaterra, quere que se empregue a linguaxe non sexista nos traballos escritos. A medida foi criticada porque o feito de non facelo podería ter un impacto negativo nas notas do alumnado.

Fonte: The Telegraph

A Academia da Lingua Mapuche da rexión chilena da Araucania informou de que o próximo censo poderá realizarse por voluntarios competentes en mapuche para non vulnerar os dereitos dos seus falantes.

Fonte: Biobío Chile

Unha iniciativa da Corporación Nacional de Desenvolvemento Indíxena de Chile (Conadi) permitirá que indíxenas da rexión de O'Higgins poidan impartir clases de mapuche en centros escolares.

Fonte: El Tipógrafo

A Rexión Autónoma Uigur de Xinjiang fortalecerá o ensino infantil bilingüe uigur-chinés coa construción de máis escolas e a contratación de profesorado competente nas dúas linguas.

Fonte: ECNS

Acábase de estrear Lo Pichòt Comtadin, un novo xornal en liña en lingua occitana que ofrecerá noticias de actualidade do mundo e do antigo condado Venaissin.

Fonte: Jornalet