Mundo
Cae o estudo da lingua indonesia no estado australiano de Queensland
A pesar das moitas iniciativas de expertos e educadores, o número de escolas de ensino secundario e superior do estado australiano de Queensland que ofrecen indonesio como materia de estudo caeu substancialmente nos últimos anos. No caso das universidades, o ensino da lingua indonesia rexistrou unha dimunición de entre o 60 e o 70 por cento.
Fonte: The Jakarta Post
Crean unha nova aplicación móbil para a aprendizaxe de linguas
O Instituto de Tecnoloxía de Massachusetts desenvolveu a aplicación "WaitSuite" que permite aproveitar os tempos mortos de espera para aprender linguas estranxeiras. A ferramenta permite, por exemplo, facer pequenos exercicios de vocabulario dunha lingua mentres esperamos a que nos respondan a unha mensaxe.
Santiago de Compostela incorpórase á Unión de Cidades Capitais de Lingua Portuguesa
A Unión de Cidades Capitais de Lingua Portuguesa (UCCLA) decidiu na súa última asemblea celebrada en Luanda (Angola) admitir a capital galega, Santiago de Compostela, na lista de cidades da lusofonía. O obxectivo da incorporación é "reforzar as relacións coas cidades do mundo lusófono e non só coas portuguesas".
Fonte: SAPO24
Un informe revela que o islandés é unha das linguas máis ameazadas na era dixital
A globalización e o uso maioritario do inglés nas novas tecnoloxías supón un atranco para linguas con poucos falantes como o islandés que, segundo un informe da Alianza Tecnolóxica Multilingüe de Europa (META, polas súas siglas en inglés), podería estar en risco de desaparición pola súa escasa presenza na era dixital.
Fonte: The Washington Post
A Unión Europea cambiará os requirimentos lingüísticos nos seus procesos selectivos
A Oficina Europea de Selección de Persoal (EPSO, polas súas siglas en inglés) acaba de mudar os requisitos lingüísticos nos seus procesos selectivos. A partir de agora, nalgúns exames será posible que os candidatos poidan escoller un número máis amplo de linguas e non só o alemán, o francés ou o inglés.
Fonte: Euroactiv
Google dará soporte lingüístico a nove linguas da India
A multinacional Google ampliará o seu soporte lingüístico a nove novas linguas da India entre as que se encontran o canarés, o guxaratí, o panxabi e o malabar.
Fonte: The Hindu Business Line
O Parlamento portugués aproba unha resolución por unanimidade que garante o desenvolvemento da lingua de signos
A Asemblea da República portuguesa aprobou, co apoio de todos os grupos parlamentarios, unha resolución para o reforzo da lingua de signos e a creación dun grupo propio de contratación de docentes.
Fonte: Notícias ao Minuto
Un estudo revela as vantaxes do bilingüismo fronte ao monolingüismo a partir dos sete anos
Un estudo realizado pola Universidade de Sydney revelou que o alumnado británico de máis de sete anos que domina máis dunha lingua rexistra mellores resultados académicos en matemáticas e lectura que o que só ten o inglés como lingua materna.
Fonte: INews
Empresarios do norte de Gales defenden o uso da lingua galesa como motor económico
Un grupo de empresarios e expertos en turismo do norte de Gales defendeu que o uso do galés pode traer consigo beneficios económicos. O Goberno do País de Gales acaba de anunciar medidas para promocionar o uso da lingua galesa nas pequenas empresas.
Fonte: Daily Post
O Ministerio de Educación de Luxemburgo introducirá un curso de formación profesional en lingua inglesa
O Ministerio de Educación de Luxemburgo anunciou que a partir do próximo outono comezará a impartirse nunha escola internacional o primeiro curso de formación profesional en lingua inglesa.
Fonte: Luxemburger Wort
Boletín
Subscríbase ao boletín
