A Oficina Pública da Lingua Vasca no País Vasco francés e a Real Academia da Lingua Vasca asinaron un acordo de seis anos en Baiona para incrementar a presenza social do éuscaro en Iparralde.

Fonte: La Vanguardia

Co obxectivo de preservar o idioma francés, un colectivo de asociacións anunciou que interporá un recurso contra o comité organizador dos Xogos Olímpicos de París 2014 por usar un slogan exclusivamente en inglés.

Fonte: Record

Unha publicación semestral do Programa de Estudos Comparados de Literaturas de Lingua Portuguesa da Facultade de Filosofía e Letras e Ciencias Humanas da Universidade de São Paulo (USP), Via Atlântica, aborda na súa trixésima edición a literatura en lingua portuguesa do estado de Goa (India).

Fonte: Jornal da USP

O libro Nonstop Metropolis: A New York City Atlas publicou un mapa que mostra a gran diversidade lingüística do distrito neoiorquino de Queens. A organización sen ánimo de lucro Endangered Language Alliance afirma que Queens é a rexión do mundo con maior riqueza lingüística.

Fonte: Business Insider

O 21 de febreiro, a Unesco celebra o Día Internacional da Lingua Materna co fin de fomentar o pleno respecto cara ao uso da lingua materna no ensino e a aprendizaxe, e a promoción e preservación da diversidade lingüística. Este ano o día destínase á promoción da educación plurilingüe.

Fonte: The Indian Express

O presidente da República de Timor Leste, Taur Matan Ruak, defendeu o reforzo da lingua portuguesa no ensino, idioma que el mesmo considerou importante para o desenvolvemento do país asiático.

Fonte: Público

O Goberno do Reino Unido permitirá que os parlamentarios galeses en Westminster poidan empregar a lingua galesa en todos os debates que se celebren no Gran Comité Galés.

Fonte: ITV

O director do Instituto Nacional de Linguas de Angola, José Domingos Pedro, quere apostar por unha maior protección e valorización de todas as linguas maternas de Angola co obxectivo de evitar conflitos lingüísticos. A política lingüística actual defende o equilibrio entre o portugués e as linguas de orixe africana.

Fonte: Notícias ao Minuto

A Alianza de Linguas Ameazadas de Toronto embarcouse nun proxecto para documentar antes de que sexa demasiado tarde a gran diversidade lingüística que existe na cidade canadense.

Fonte: CBC

A BBC incrementará nun 50 % o número de programas en lingua inglesa na canle de televisión BBC Gales. Con esta expansión, a entidade pública quere tamén chegar a un público máis novo e desenvolver os contidos en liña.

Fonte: WalesOnline