O Goberno do Estado de São Paulo anunciou que en breve comezarán as obras de restauración do Museo da Lingua Portuguesa que fora parcialmente destruído por un incendio en 2015.

Fonte: Público

A ministra de Asuntos Exteriores da India, Sushma Swaraj, declarou que o Goberno da India está facendo o posible para popularizar o hindi internacionalmente e convertelo en lingua oficial das Nacións Unidas.

Fonte: Hindustan Times

Un estudo realizado por un profesor da Universidade de Cardiff revela que os defensores da lingua galesa son maioría no País de Gales. Segundo a análise, só un de cada seis galeses pensa que "Gales estaría mellor sen a lingua galesa". Pola contra, case un terzo considera que se deberían tomar medidas excepcionais para promover a lingua vernácula.

Fonte: Wales Online

O organismo de promoción do gaélico escocés Bòrd na Gàidhlig está elaborando un estudo para analizar o impacto que teñen os medios de comunicación en gaélico, como a BBC Alba e a BBC Radio nan Gàidheal, na aprendizaxe desta lingua en Escocia.

Fonte: BBC

A Asemblea da República de Portugal debaterá unha proposta que pretende introducir o ensino da lingua de signos portuguesa a alumnado que non sexa xordo.

Fonte: Sapo

O eurodeputado portugués João Ferreira decidiu cancelar a súa participación na sesión parlamentaria entre o Grupo de Estados de África, Caribe e Pacífico e a Unión Europea, que se celebrará en Kenya, pola negativa do Parlamento Europeo a habilitar servizos de interpretación en portugués.

Fonte: Jornal Económico Sapo

Un informe sobre a presenza das linguas estranxeiras no ensino público do País de Gales revelou que se duplicou o número de estudantes que aprenden chinés mandarín.

Fonte: Wales Online

Un protocolo asinado entre o Instituto Camões e a Universidade de Luxemburgo permitirá contratar un lector de lingua e cultura portuguesas neste centro de ensino. O obxectivo é desenvolver os estudos portugueses no ensino superior luxemburgués e favorecer o intercambio académico entre institucións educativas de Luxemburgo e Portugal.

Fonte: Luxemburger Wort

O grupo automobilístico Volkswagen decidiu adoptar o inglés como lingua oficial de comunicación en detrimento do alemán.

Fonte: Automonitor

O dicionario en liña da lingua portuguesa Priberam publicou no sitio web "O Ano em Palavras" as 200 palabras máis buscadas en todo o ano 2016.

Fonte: Delas