O conselleiro de Política Lingüística, Francesc Xavier Vila, anunciou un plan para mellorar a aprendizaxe do catalán entre adultos que inclúe a creación de novos formatos de cursos, o aumento da oferta en horarios demandados e a colaboración con entidades locais e sociais. Este proxecto chega tras denuncias sobre dificultades de acceso aos cursos.

Fonte: Generalitat de Catalunya

O Museo Terra de Barcelona acolleu a presentación dun mapa actualizado das variantes dialectais do catalán, realizado polos dialectólogos Pere Navarro, da Universidade Rovira i Virgili (URV), e Vicent Beltran, da Universidade de Alacant (UA). Este mapa presenta una vintena de dialectos e subdialectos, que de forma xeral se dividen no catalán occidental e oriental.

Fonte: El Nacional

A Universidade Pompeu Fabra (UPF) lanza o primeiro curso universitario dedicado á lingua de signos catalá (LSC) para que titulados en Tradución, Linguas Aplicadas ou Filoloxía poidan especializarse nesta área. O novo título, de tres anos de duración e 58 créditos ECTS, busca formar máis intérpretes e tradutores en LSC ante a demanda da comunidade xorda e o crecente interese académico. Este curso propio compleméntase cos estudos de grao que a UPF xa ofrece en LSC, o que o consolidada como un centro de referencia na docencia e investigación sobre esta lingua.

Fonte: Universitat Pompeu Fabra

O Plan Lingüístico do Equipo de Atención Primaria Sardeña servirá para garantir o dereito dos pacientes a ser atendidos en catalán e fomentar esta lingua na atención por parte dos profesionais sanitarios, así como mellorar o seu coñecemento e uso.  

Fonte: Generalitat de Catalunya

A portavoz do Goberno comprometeuse a poñer en marcha melloras para facilitar o acceso das persoas migrantes aos cursos de catalán, despois dunha denuncia polas dificultades no proceso de inscrición, como o colapso da plataforma e as longas esperas.

Fonte: Infobae

O Departamento de Investigación e Universidades reabriu o programa Parla 3 para o curso 2024-2025, con axudas de ata 600 euros para estudantes universitarios que queiran aprender unha terceira lingua. A formación deberá seguir os niveis do Marco Europeo Común de Referencia para as Linguas (MECR) e a dotación total será de 800 000 euros.

Fonte: El Nacional

O Centro de Terminoloxía de Cataluña (TERMCAT) e a Fundación Barcelona Capital Náutica presentaron un dicionario en liña que recolle a terminoloxía máis destacada sobre a Copa América de vela.

Fonte: Gencat

O acordo entre a Generalitat e o Goberno español permitirá publicar no Boletín Oficial do Estado as principais leis en catalán. Así, as leis orgánicas, os reais decretos ou as disposicións xerais poderán ser traducidas e incluídas nun suplemento electrónico. As traducións estarán a cargo do EADOP e contribuirán a unha maior difusión da normativa estatal en catalán.

Fonte: Generalitat de Catalunya

Un informe da Consellería de Política Lingüística de Cataluña analiza a situación do catalán. Nel recoñecese a súa importancia demográfica en Europa, con máis de 10 millóns de falantes, pero advírtese do retroceso no seu uso en ámbitos clave como a educación e a sanidade. Propón cinco obxectivos estratéxicos para reverter esta tendencia, como facilitar o uso social da lingua e asegurar a súa normalización nas institucións. Ademais, aborda a situación crítica do aranés e a necesidade de mellorar a formación e difusión da lingua de signos catalá.

Fonte: Generalitat de Catalunya

A empresa BYD, líder mundial en coches eléctricos, incorporou o catalán no seu sistema de información a bordo, malia que a tradución é aínda mellorable. A plataforma Aliança per la Presència Digital del Català, que impulsou esta incorporación, comprométese a colaborar coa empresa para perfeccionar a tradución e confía en que esta decisión sirva de exemplo para outras marcas. Actualmente, Tesla e BYD son as únicas marcas de vehículos eléctricos que ofrecen o catalán nos seus sistemas dixitais.

Fonte: El Món