O executivo balear só esixirá un requisito mínimo de coñecemento do catalán aos traballadores públicos que teñan como función principal a información e a atención ao alumnado nos centros educativos ou a recepción ao público e/ou atención telefónica.

Fonte: Europa Press

A Consellería de Educación obrigará o colexio público de Son Ferriol a incluír a materia de castelán no seu horario escolar. Desta forma, o centro terá que modificalo e impartir catro horas de lingua castelá á semana. Ata agora, os alumnos de segundo de Primaria non recibían ningunha clase de castelán nese centro.

Fonte: El Mundo

En contra do que se podería esperar, a libre elección de lingua para aprender a ler e escribir en castelán non inclinou a balanza a favor da lingua de Cervantes, nin sequera nos centros con máis inmigración.

Fonte: La Vanguardia

Os alumnos de Educación Primaria de Baleares deberán cursar un mínimo de cinco horas en cada unha das linguas oficiais (castelán e catalán) e na lingua estranxeira, preferiblemente, o inglés.

Fonte: Europa Press

O Goberno balear rematou coa colaboración con Cataluña para promover a lingua e a cultura catalás. As illas non farán contribución económica ningunha o vindeiro ano ao Instituto Ramon Llull (IRL), segundo consta no anteproxecto de orzamentos da comunidade para o 2013.

Fonte: La Vanguardia

Un total de 39 centros educativos de Baleares e 70 profesores adherirase ao plan piloto de educación plurilingües impulsado polo Goberno das illas, un “primeiro paso” para normalizar o coñecemento tanto das linguas castelán e catalán como da inglesa nas escolas e institutos.

Fonte: Qué!

Mallorca disporá dunha emisora de radio nova, Ona Mediterrània, unha emisora exclusivamente en catalán que podería comezar as emisións regulares en abril e que pretende recuperar a voz propia de Mallorca e protexer a cultura balear.

Fonte: Vilaweb

A demanda do catalán nas escolas de adultos de Menorca caeu en picado desde que esta lingua xa non é requisito para acceder á función pública en Baleares. Desde que o Goberno autonómico deu a coñecer este cambio de criterio hai dous anos, perdéronse o 66 % das matriculacións nesta materia.

Fonte: Última Hora

O Concello de Sant Llorenç des Cardassar aprobou en pleno que o catalán siga sendo un requirimento e non un mérito para acceder a un emprego público municipal.

Fonte: Diario de Mallorca

O Concello de Manacor aposta forte polo catalán como ferramenta comunicativa e cultural. Proba disto foi a presentación das convocatorias aos Premios Ciutat de Manacor 2013, que programou ata catro galardóns de creación literaria, distribuídos nas categorías de novela, poesía, teatro e ensaio, dotados de 5000 euros o primeiro e 3000 os tres seguintes, “para así poder facerse eco por todos os Países Cataláns”.

Fonte: Diario de Mallorca