País Vasco
Todas as películas da sección oficial do Festival de Cine de San Sebastián contarán por primeira vez con subtítulos en éuscaro
Todas as películas da Sección Oficial do Zinemaldia contarán, a partir da edición deste ano, con subtítulos en éuscaro, ademais de en castelán e inglés. Deste xeito, desde o festival queren contribuír ao uso e fomento da lingua vasca, así como á súa visualización internacional.
Fonte: El Diario
Dez clubs eibarreses elaboran un plan de éuscaro para a tempada 2023-2023
O Concello de Éibar solicitoulles aos clubs deportivos aos que lles asigna subvencións a elaboración dun plan de éuscaro, cuxo obxectivo é que esta lingua forme parte da actividade diaria destas entidades e do seu persoal.
Fonte: Eibarko Udala
O Concello de San Sebastián organiza cursos para atender a clientela en éuscaro
Estes cursos de éuscaro están dirixidos a profesionais do sector do comercio e desenvolveranse entre os meses de outubro e febreiro co obxectivo de axudar a mellorar a atención á clientela euscalduna.
Fonte: San Sebastián Shops
Increméntase o coñecemento do éuscaro en Vitoria
Nos últimos anos incrementouse o coñecemento do éuscaro na capital vasca, segundo mostran os datos facilitados polo Concello de Vitoria relativos ao ano 2021. Así, case o 30 % da súa poboación é euscalduna (7,4 puntos máis que en 2011); o 16,3 % entende esta lingua aínda que non a fala; e o 54,8 % é castelanfalante.
Fonte: Noticias de Álava
As cooperativas de Mondragón impulsan a elaboración de plans de éuscaro
Os membros de Euskaragileak animan a outras empresas a pór en marcha plans de éuscaro adaptados ás súas características e necesidades, para o que elaboraron un documento informativo que divulgarán polas empresas.
Fonte: TU Lankide
O Concello de Amorebieta-Etxano pon en marcha un proxecto para aprender éuscaro a través de cancións vascas
O proxecto Kantakatilu, que se porá en marcha a partir de outubro, consiste na práctica do éuscaro a partir de cancións vascas, co obxectivo de practicar esta lingua e crear redes entre euscaldúns.
O Concello de Samaniego convoca axudas para o estudo do éuscaro
Para poder beneficiarse destas axudas, cómpre levar empadroado/a no municipio, polo menos, un ano; ter máis de 16 anos e estar matriculado/a nun centro de ensino de éuscaro.
Fonte: Gaztea
O Concello de Laudio concede 103 bolsas para a aprendizaxe do éuscaro
O Concello de Laudio aboou os importes das 103 solicitudes presentadas á convocatoria de axudas para as bolsas de éuscaro do curso 2022-2023.
Fonte: Noticias de Álava
Segundo un informe, Google responde con resultados en castelán ás buscas en éuscaro
Segundo un informe do Observatorio Puntueus, o algoritmo de Google responde ás buscas de usuarios euscaldúns con resultados en castelán, o que supón unha exclusión para o éuscaro e unha redución da visibilidade desta lingua na rede.
Fonte: Onda Vasca
O Concello de Hondarribia convoca axudas para promover o uso do éuscaro
Estas axudas, que teñen asignado un orzamento de 37 600 euros, están destinadas a apoiar actividades que contribúan ao fomento do uso do éuscaro na sociedade.
Fonte: Cadena SER
Boletín
Subscríbase ao boletín
