Xa está na rede Lsexpress, unha tenda en liña desenvolvida polo centro educativo Comunidade Xorda a Fundación Andaluza Accesibilidade e Persoas Xordas (Grupo FAAS) para ofrecer a todas as persoas interesadas cursos a distancia para aprender lingua de signos e cursos de prácticas de interpretación da lingua de signos.

Fonte: Diario Signo

Fundéu BBVA acaba de lanzar unha aplicación para resolver calquera dúbida lingüística en dispositivos móbiles ao ofrecer resposta a máis de 5000 cuestións e permitir consultar directamente o equipo de lingüistas da Fundación do Español Urxente.

Fonte: La Información

Os profesores alertan de que a xente nova comete cada vez máis faltas de ortografía. Atopan moitos erros relacionados coa linguaxe que os estudantes utilizan nas mensaxes de móbil. Desde os centros educativos redobran esforzos para evitar unha deformación da linguaxe.

Fonte: Antena 3

A Comisión de Educación do Congreso aprobou unha iniciativa que lle pide ao Goberno que á hora de proceder á internacionalización das universidades se teñan en conta as linguas cooficiais, como por exemplo o catalán.

Fonte: Ibercampus

O Goberno de Mariano Rajoy quixo deixar claro que un cidadán "non ten dereito” a esixirlle á Administración española que se dirixa a el na súa lingua cooficial e que esta só pode empregarse ante a Administración cando a súa sede “estea situada nunha comunidade bilingüe”.

Fonte: Deia

O Goberno central, a través do Ministerio do Interior, está adoptando unha serie de medidas para garantir a accesibilidade a colexios electorais nas próximas eleccións ao Parlamento Europeo e por iso prevé que as campañas institucionais informativas de diversos aspectos do proceso electoral se realicen con subtitulado e tradución á lingua de signos.

Fonte: La Información

A Fundación da Confederación Estatal de Persoas Xordas de España (CNSE) e a Fundación Solidariedade Carrefour, co apoio da Fundación ONCE, presentaron a primeira tradución de O Principiño á lingua de signos española. Esta edición componse do libro orixinal en español acompañado por un DVD coa tradución da obra íntegra á lingua de signos española, e locución e subtitulado en castelán.

Fonte: Europa Press

O ministro de Xustiza, Alberto Ruiz Gallardón, anunciou que reformará o sistema actual de concesión de nacionalidade para acabar coa “discrecionalidade” da Administración. Deste modo, adiantou que o Instituto Cervantes se encargará da proba de idioma e cultura españolas e que se elaborará un manual que deberán estudar os solicitantes sobre o que se avaliará o seu grao de integración e coñecemento da cultura española.

Fonte: Huffington Post

Microsoft Office 365 para empresas está xa dispoñible en vasco, catalán e galego, dentro do seu obxectivo de “chegar ao máximo número de usuarios e adaptarse aos seus requirimentos na vida dixital, tanto doméstica como profesional”.

Fonte: Te Interesa

Falar e escribir unha lingua estranxeira e dominar as tecnoloxías son os novos requisitos que quere incluír o Ministerio de Educación nas oposicións a profesor. Os aspirantes deberán examinarse dunha proba de idioma estranxeiro oral e escrita e acreditar que teñen unha competencia dixital apropiada, independentemente do nivel da especialidade que impartan. Os idiomas e a tecnoloxía contarán máis que a experiencia docente.

Fonte: Telecinco