España
O Concello de Donostia abre o prazo para inscribirse nos cursos de éuscaro dirixidos a profesionais do comercio e a hostalería
O Concello de Donostia, en colaboración con asociacións e entidades vinculadas ao comercio e á hostalería, organiza cursos de éuscaro, de 60 horas de duración, dirixidos aos profesionais destes dous sectores co obxectivo de mellorar a atención á clientela euscalduna.
Fonte: Noticias de Gipuzkoa
Jaca acolle a sinatura dun convenio de colaboración para promover ferramentas tecnolóxicas para o éuscaro, o aragonés e o occitano
As universidades de Zaragoza, Pau, País Vasco e Pública de Navarra, e a fundación Elhuyar asinaron un acordo que ten como obxectivo fomentar as ferramentas e as aplicacións tecnolóxicas desenvolvidas ao abeiro do proxecto Linguatec para o aragonés, o éuscaro e o occitano.
Fonte: Universidad del País Vasco
Cataluña, Baleares e Comunidade Valenciana apostan por reforzar o uso social do catalán
Catalunya Ràdio organizou unha mesa redonda sobre lingua na que participaron representantes dos gobernos de Galicia, País Vasco, Baleares, Comunidade Valenciana e Cataluña. As tres últimas apostan por formar unha fronte común para fomentar o uso do catalán, mentres que as dúas primeiras celebran a consolidación do galego e o éuscaro, respectivamente.
Fonte: Valencia Plaza
A Generalitat de Cataluña ten dous meses para aplicar a sentenza que obriga a impartir o 25 % das clases en castelán
O Tribunal Superior de Xustiza de Cataluña declarou firme a sentenza que obriga a impartir un 25 % de clases en castelán nos centros de ensino, polo que a Generalitat deberá, nun prazo de dous meses, executala de forma voluntaria.
Fonte: El País
O Concello de Nules organiza unha nova campaña de promoción do valenciano nas rebaixas
O Concello de Nules puxo en marcha unha campaña de fomento do valenciano coa repartición de carteis e etiquetas nesta lingua entre o comercio local para a época de rebaixas.
Fonte: Castellón Diario
Piden que se traduzan ao éuscaro todos os trámites de administración electrónica en Navarra
A Mancomunidade de Municipios Euscaldúns e o Observatorio de Dereitos Lingüísticos demandan que se traduzan ao éuscaro todos os trámites de administración electrónica en Navarra, xa que só o 23,29 % deles se pode realizar nesta lingua, unha porcentaxe que se reduce aínda máis nos concellos e as entidades locais, onde alcanza o 2,57 %.
Fonte: Noticias de Navarra
Publícase un informe que revela que a mocidade catalá consome máis televisión en castelán
O observatorio Media.cat publica un relatorio que revela que a canle de contidos en catalán TV3 está a perder influencia entre a mocidade catalá e que cada vez máis rapazada consome televisión en lingua castelá.
Fonte: El Nacional
Un catedrático da Universidade de Oviedo lanza unha proposta sobre a oficialidade do galego en Asturias
O catedrático de dereito constitucional, Miguel Ángel Presno Linera, propón, con motivo da reforma do Estatuto de Autonomía de Asturias, que o galego-asturiano sexa recoñecido como lingua propia do territorio comprendido entre os ríos Eo e Navia e como lingua oficial de toda a comunidade autónoma.
Fonte: Xornal da Mariña
O Bierzo volve demandar a oficialidade do galego co gallo das eleccións autonómicas
O Colectivo Fala Ceibe do Bierzo, organización que defende o galego en Castela e León, demandou, co gallo das eleccións autonómicas, unha reforma do estatuto da comunidade autónoma que inclúa a oficialidade do galego e a inclusión desta lingua no currículo de todas as escolas do Bierzo occidental.
Fonte: Lugo Xornal
O sindicato CCOO e Podemos coinciden na necesidade de crear a especialidade docente de lingua asturiana
A Federación de Ensino de CCOO aproveitou a súa xuntanza coa nova cúpula do partido Podemos en Asturias para demandar a necesidade de crear a especialidade docente de lingua asturiana.
Fonte: Europa Press
Boletín
Subscríbase ao boletín
