España
O Concello de Huesca convoca o sexto Premio Pedro Lafuente en aragonés
O Premio Pedro Lafuente en aragonés conta con catro categorías: narración curta, para textos cunha extensión de entre 15 e 20 páxinas; poesía, para poemas de entre 100 e 300 versos; zagals, para obras escritas por nenos de entre 3 e 12 anos; e empresa, para negocios que destacan pola súa difusión e defensa da lingua aragonesa.
Fonte: Radio Huesca
O Concello de Andoain pon en marcha unha campaña para fomentar a transmisión do éuscaro
O Concello de Andoain, en colaboración con varios centros de ensino, lanzou a campaña «Ogia ez dadila falta... ezta euskara ere!» coa que pretende animar as familias do municipio a asumir un papel protagonista na transmisión do éuscaro.
Fonte: El Diario Vasco
Entréganse os certificados Bikain á calidade en xestión lingüística que recoñece o traballo de 27 entidades
O lehendakari, Iñigo Urkullu, fixo entrega do certificado de calidade en xestión lingüística Bikain, que recoñece o labor a prol da normalización do uso do éuscaro das 27 entidades públicas e privadas distinguidas este ano.
Fonte: Deia
Instan o Goberno de Navarra e o Concello de Pamplona a implantar novas escolas infantís co modelo de inmersión en éuscaro
A plataforma HE Gurasoak e un grupo de familias instaron o Goberno navarro e o Concello de Pamplona a implantar as novas escolas infantís de Mendebaldea e Lezkairu co modelo de inmersión en éuscaro.
Fonte: Navarra.com
Institucións e entidades catalás e andorranas únense para impulsar o uso do catalán na xustiza
Un total de 18 institucións e entidades catalás e andorranas asinaron un convenio para impulsar o uso do catalán na xustiza mediante a creación de Compendium.cat, un portal de recursos de linguaxe xurídica nesta lingua aberto a todos os profesionais que traballan neste ámbito e á cidadanía en xeral.
Fonte: Generalitat de Catalunya
O Concello de Novelda pon en marcha a campaña “Cartes dels Reis d’Orient 2022” para fomentar o uso do valenciano entre os escolares
Ao abeiro desta iniciativa repartiranse cartas dos Reis Magos en papel, acompañadas de material didáctico complementario, e ofrecerase a posibilidade de descargala en internet a través dunha plataforma que contén, ademais, actividades adicionais como xogos e cancións.
Fonte: Ayuntamiento de Novelda
O Concello de Oñati aproba unha declaración que destaca a importancia de utilizar o éuscaro en ámbitos non formais
Esta declaración, que leva por título 'Euskarak arnas berri', foi aprobada por unanimidade pola corporación municipal e ten como obxectivos fomentar o uso do éuscaro máis alá dos espazos habituais e apoiar unha práctica moito máis xeneralizada desta lingua.
Fonte: Diario Vasco
O Concello de Oviedo aproba unha proposición que rexeita a inclusión da cooficialidade do asturiano na reforma do Estatuto de Autonomía
O pleno do Concello de Oviedo rexeitou, por iniciativa do equipo de goberno, incluír a cooficialidade do asturiano na reforma do Estatuto de Autonomía, actualmente en período de negociacións.
Fonte: EFE
Institucións das Illas Baleares establecen un marco de colaboración en materia de normalización da lingua catalá na radio e a televisión públicas do arquipélago
O Goberno balear, a Universidade das Illas Baleares e IB3 asinaron un protocolo de actuación co obxectivo de mellorar os usos lingüísticos na televisión e na radio públicas do arquipélago.
Fonte: Última Hora
O Termcat publica un novo dicionario en liña sobre seguridade alimentaria
Este novo dicionario recolle arredor de 500 termos relacionados coa alimentación, a cadea alimentaria, os sistemas de control, os aditivos, os estudos de dieta etc. Cada entrada inclúe a denominación en catalán e as equivalencias en castelán, francés e inglés, así como unha definición e unhas notas explicativas con información adicional.
Fonte: Generalitat de Catalunya
Boletín
Subscríbase ao boletín
