España
Dúas mancomunidades navarras presentan un documental para animar a aprender éuscaro
As Mancomunidades de Éuscaro de Bortziriak e de Malerreka colaboraron na produción dun documental con testemuños de alumnos dos seus euskaltegis que se presentará para a campaña de matriculación no novo curso.
Fonte: Noticias de Navarra
Comeza unha campaña para promover o coñecemento da diversidade lingüística de Navarra
O Instituto Navarro do Éuscaro é o impulsor de A que soa Navarra?, unha campaña que se celebra con motivo do Día Europeo das Linguas e a través da que se realizarán actividades que teñen como obxectivo a difusión da diversidade lingüística e o fomento da aprendizaxe de linguas en varias localidades da comunidade foral, ademais de nos medios de comunicación.
Fonte: Noticias de Navarra
O Goberno vasco concédelle unha subvención á Mancomunidade de Municipios Euscaldúns para impulsar iniciativas de fomento do éuscaro
A cantidade da axuda concedida polo Goberno vasco a esta mancomunidade ascende a 75 000 euros e ten como obxectivo a posta en marcha de iniciativas de reforzo do éuscaro nos arnasgune (municipios cunha elevada proporción de persoas euscaldunas) e nas zonas nas que é a lingua prioritaria.
Fonte: La Vanguardia
Denuncian a precariedade dos docentes que imparten a materia de Lingua Asturiana
De xeito xeral, o profesorado desta materia é interino e o 85% ten un contrato a media xornada. Así mesmo, gran número de prazas quedan desertas, polo que a contratación non cobre a demanda real existente.
Fonte: Info Asturies
O programa Emmarca’t promove en Cataluña o emprego do catalán entre as grandes marcas
Segundo a Enquisa de usos lingüísticos da poboación 2018 de Cataluña, o 75 % dos profesionais emprega o catalán na atención ao público. Este e outros argumentos recóllense na publicación editada por Política Lingüística coas cincuenta razóns para motivar o empresariado a empregar esta lingua para publicitar a súa marca.
Fonte: La Vanguardia
O Goberno balear e IB3 colaborarán para formalizar un compromiso sobre o uso do catalán na radio e a televisión
Dado que a televisión e a radio públicas resultan fundamentais para a normalización lingüística, a lingua que se emprega nestes medios de comunicación debe converterse nun modelo de referencia para os falantes, motivo polo que se acordarán uns criterios lingüísticos e unhas pautas de uso da linguaxe.
Fonte: Diario de Ibiza
O Departamento navarro de Educación reedita os programas educativos para mellorar a competencia oral en éuscaro
Durante o mes de setembro reeditaranse varios programas educativos que teñen como obxectivo fomentar a oralidade, o gusto pola lectura e a música e a transmisión da cultura vasca entre o alumnado.
Fonte: 20minutos
O Goberno de Aragón convoca un programa para a difusión do catalán e as súas modalidades lingüísticas nos centros educativos
Destinado tanto a centros educativos públicos como privados, o programa Jesús Moncada pretende achegar a oferta de actividades en catalán e as súas modalidades lingüísticas en Aragón ao alumnado, adaptándoa a todas as áreas curriculares.
Fonte: Lenguas de Aragón
O Concello de Bilbao lanza unha nova campaña para promover a matriculación nos euskaltegis
Tras coñecer que preto de 500 000 persoas pasaron por estes centros de ensinanza de éuscaro dende 1968, esta campaña busca continuar aumentando a cifra coa contribución de 209 000 euros, que se suman á xa realizada pola Consellería de Cultura e Política Lingüística no mesmo ámbito.
Fonte: El Correo
O Goberno navarro lanza unha campaña para impulsar a aprendizaxe do éuscaro entre a poboación adulta
Baixo o lema 'Non perdas a oportunidade de aprender éuscaro', o Goberno de Navarra, en colaboración con 33 entidades locais e os euskaltegis, pon en marcha unha campaña para animar a poboación adulta a aprender esta lingua.
Fonte: La Vanguardia
Boletín
Subscríbase ao boletín
