Os europarlamentarios Ramon Tremosa (CiU), Oriol Junqueras (ERC) e Raül Romeva (ICV) denunciaron que o Goberno español segue incumprindo os acordos que asinou no ano 2005 coas institucións europeas polos que se aprobou que a correspondencia cos cidadáns catalanoparlantes se puidese facer en catalán, tal como fixo público Horitzó Europa.

Fonte: La Vanguardia

A conselleira de Educación e Cultura de Aragón, María Victoria Broto, explicou nas Cortes que a Comunidade dispón de 72 programas bilingües nos centros educativos con máis de 10.000 alumnos.

Fonte: ABC

O Síndic de Greuges da Comunidade Valenciana, José Cholbi, recoméndalle á Consellería de Sanidade que nas súas publicacións institucionais adopte "todas as medidas que sexan necesarias para que os folletos e os formularios estean redactados nas dúas linguas cooficiais da Comunidade Valenciana, de xeito que non poida prevalecer unha lingua sobre a outra".

Fonte: Europa Press

Partidarios da lingua celebraron o Día das Letras Asturianas reclamando a oficialidade, nunha concorrida manifestación que, como todos os anos, organizou a Xunta pola Defensa da Lingua Asturiana.

Fonte: Europa Press

Tan só para acceder ao 1 % dos postos de traballo da Administración foral de Navarra é preceptivo o coñecemento do éuscaro. Hai outras prazas no Goberno nas que o éuscaro conta como mérito, pero este só representa o 1 ou 2 % do total.

Fonte: Noticias de Navarra

A CNSE para a Supresión das Barreiras de Comunicación e a Fundación Carrefour presentaron un novo dicionario infantil bilingüe de lingua de signos española e lingua española. Baixo o título Descubre nuevos signos, ambas as entidades teñen como obxectivo acercar a lingua de signos aos menores, tanto xordos como oíntes, de entre tres e oito anos de idade.

Fonte: Europa Press

Unha enquisa realizada pola empresa de recursos humanos Adecco sobre os idiomas máis valorados polo mercado laboral sinala que para o 100% dos empregados o inglés é o idioma máis apreciado; seguido do alemán, elixido polo 47%; do francés, polo 33,6%; e do chinés, polo 18%. Porén, as valoracións cambian cando se lles pregunta polos dous idiomas do futuro. O inglés segue sendo o máis valorado, polo 92,2% dos enquisados, pero o chinés ascende ata o segundo lugar para o 69,5%.

Fonte: 20 minutos

Cultura promoverá o éuscaro a través das actividades que se desenvolverán en paralelo á celebración dos próximos cursos de verán da Universidade do País Vasco (UPV).

Fonte: El País

A matriculación na materia de Lingua Asturiana incrementouse nos últimos dez anos nuns 9.700 alumnos segundo informou o conselleiro de Educación, José Luis Iglesias Riopedre, quen engadiu que o profesorado desta materia aumentou nun 63 por cento no mesmo período.

Fonte: La Nueva España

Un total de catro de cada dez parellas de orixe castelanfalante fálalles en catalán con tanta ou máis intensidade ca en castelán aos seus fillos, segundo o estudo Llengua i joves. Usos i percepcions lingüístics de la joventut catalana (Lingua e mocidade. Usos e percepcións lingüísticas da xuventude catalá.

Fonte: Avui