A Consellería de Educación da Comunidade Valenciana poñerá en marcha o bacharelato mixto español-francés durante o próximo curso 2011-2012, unha modalidade que permitirá obter a dobre titulación aos estudantes que a superen con éxito.

Fonte: ABC

A nova conselleira de Ensino da Generalitat de Catalunya, Irene Rigau, explicou que, en materia de política lingüística nas escolas, despregará a Lei de educación de Cataluña (LEC), unha normativa que "consagra" o catalán como lingua vehicular.

Fonte: Europa Press

Aínda que en certos ámbitos se poidan cualificar coma insuficientes, o certo é que tanto desde os distintos concellos da provincia de Castelló como desde diversas asociacións culturais se ofrecen multitude de programas e actividades relacionados co uso do valenciano.

Fonte: Las Provincias

A canle de noticias da Televisió de Catalunya (TVC) 3/24 emitirá as noticias da noite en lingua de signos, ofrecendo así máis de tres horas semanais nesta lingua.

Fonte: Europa Press

Esquerra Republicana de Catalunya (ERC) volveu resucitar a súa iniciativa para reformar o Regulamento do Congreso dos Deputados co fin de garantir “canto antes” o uso do catalán, o éuscaro e o galego na Cámara Baixa.

Fonte: El Mundo

O vicedirector da Real Academia Española, José Antonio Pascual, criticou na Universidade de Salamanca a “falta de claridade" da linguaxe administrativa e o uso inadecuado que se fai das palabras técnicas por parte dos profesionais cando non falan con colegas.

Fonte: ABC

Ciutadans anunciou que ofrecerá asesoramento legal aos pais que desexen pedir ás escolas ou ao Departamento de Ensino da Generalitat de Catalunya que a lingua vehicular sexa tanto a castelá como a catalá, de acordo co que sinala unha sentenza do Tribunal Supremo.

Fonte: ADN

A escolarización en valenciano sobe en todos os niveis, aínda que é a educación secundaria obrigatoria (ESO) a que máis crece, ao pasar en dez anos do 10,81 % dos alumnos matriculados no curso 1998 a un 26,02 % no 2007/2008. Isto despréndese do informe "O libro branco do ensino secundario" dado a coñecer recentemente. Nel tamén se indica que 35 institutos públicos menos ensinan esta lingua, aínda que o número de grupos aumenta en 1.468 máis (o 21,7 %). "Menos centros teñen máis grupos en valenciano", subliña o "Libro branco".

Fonte: Levante

A Junta de Andalucía oferta para este curso 2010-2011 un total de 9.000 prazas para a realización de estancias formativas e intercambios escolares no estranxeiro para mellorar a aprendizaxe de idiomas (inglés, francés e alemán) do alumnado andaluz de ESO, bacharelato e ciclos formativos.

Fonte: ABC

A Asociación Nacional pola Liberdade Lingüística (ANNL) realizou un estudo detallado sobre o uso do castelán nas páxinas web dos concellos situados nas comunidades en que existe máis dunha lingua oficial. O resultado foi demoledor: 868 municipios non ofrecen aos seus veciños unha versión da súa web en castelán.

Fonte: Libertad Digital