Galicia
Publícase un volume de estudos sobre a estandarización das linguas na península ibérica
O Consello da Cultura Galega publicou en liña A estandarización das linguas na Península Ibérica: procesos, problemas e novos horizontes, un volume que recolle unha serie de traballos que ofrecen unha panorámica sobre os procesos de estandarización destas linguas: galego, portugués europeo e brasileiro, catalán, éuscaro e castelán.
Fonte: Consello da Cultura Galega
A Deputación de Pontevedra convoca axudas destinadas ás entidades culturais para o fomento do galego
Esta convocatoria de axudas está dirixida a entidades culturais sen fin de lucro e subvencionará proxectos que teñan como obxectivo fomentar o uso e o prestixio do galego, ou estudar aspectos relacionados coa sociolingüística e a toponimia.
Fonte: Consello da Cultura Galega
O Concello de Redondela organiza un ciclo de cinema en galego
O Multiúsos da Xunqueira acollerá este ciclo de cinema en galego ao longo dos meses de maio e xuño no que se proxectarán catro longametraxes: O Corno, Sica, As bestas e Os días afogados.
Fonte: Radio Redondela
A X Xornada do Día das Letras Galegas achégalle a figura de Luisa Villalta ao profesorado encargado de divulgar a súa obra entre a rapazada
O conselleiro de Cultura, Lingua e Xuventude, José López Campos, participou na apertura da X Xornada do Día das Letras Galegas, organizada cada ano pola Secretaría Xeral da Lingua e o Centro Autonómico de Formación e Innovación (CAFI).
Fonte: O Portal da Lingua Galega
A Cidade da Cultura reúne representantes dunha vintena de linguas minoritarias para traballar na promoción da diversidade lingüística en Europa
A Cidade da Cultura reuniu as persoas representantes dunha vintena de linguas minoritarias de Europa durante a asemblea xeral e a conferencia anual da Network to Promote Linguistic Diversity (NPLD), unha organización de ámbito europeo cuxa finalidade é promover a diversidade lingüística na Unión Europea.
Fonte: O Portal da Lingua Galega
O protocolo de colaboración en materia de política lingüística elixe de novo Santiago para celebrar a súa reunión anual
O secretario xeral de Política Lingüística, Valentín García, participou na reunión anual da comisión de seguimento do Protocolo de colaboración en materia de política lingüística subscrito polos gobernos de Galicia, Cataluña, Illas Baleares, Comunidade Valenciana, Navarra e o País Vasco para establecer unha estrutura de colaboración entre os departamentos de política lingüística das comunidades autónomas con lingua propia.
Fonte: O Portal da Lingua Galega
A Xunta e a Real Academia Galega renovan o convenio de colaboración para a utilización das instalacións da Cidade da Cultura
O conselleiro de Cultura, Lingua e Xuventude, José López Campos, e o presidente da Real Academia Galega, Víctor Fernández Freixanes, reafirmaron o seu compromiso de colaboración entre ambas as institucións na promoción e defensa da lingua galega durante o seu primeiro encontro, celebrado na Cidade da Cultura de Galicia.
Fonte: O Portal da Lingua Galega
O Concello da Coruña organiza andainas guiadas para coñecer a relación da cidade coa lingua galega e a literatura
Trátase dunha nova edición do programa «A Coruña das Letras» que inclúe unha serie de andainas por diferentes barrios da cidade guiadas polo músico e escritor Xurxo Souto.
Fonte: Consello da Cultura Galega
Convócase unha nova edición do Certame Ouff Escola para impulsar o uso do galego entre a mocidade
O Concello de Ourense, en colaboración coa Secretaría Xeral de Política Lingüística, convoca a décimo quinta edición deste certame dirixido a centros de ensino que ten como obxectivos fomentar o uso do galego e a creatividade audiovisual entre a mocidade, así como promover o traballo en equipo.
Fonte: Consello da Cultura Galega
Feiraco organiza un certame de microrrelatos para fomentar a creatividade literaria en galego
Feiraco súmase á celebración do Día das Letras Galegas coa convocatoria da 12.ª edición do Certame de Microrrelatos Feiraco que ten como obxectivo fomentar a dinamización do galego e a creatividade literaria nesta lingua. Os relatos deberán ter 500 palabras como máximo, de temática libre, pero deben comezar coa frase “Púxenme a escoitar”.
Fonte: Consello da Cultura Galega
Boletín
Subscríbase ao boletín
