En 2024 editáronse en Galicia 1948 novos libros, dos que dous terzos se publicaron en galego, situando a oferta total en máis de 22 000 títulos. O sector facturou 27,7 millóns de euros, con predominio do formato impreso e das categorías infantil, xuvenil e texto non universitario. Máis da metade das vendas corresponden a obras en galego, distribuídas sobre todo a través das librerías.

Fonte: Galicia Confidencial

O encontro literario Galeusca 2025 reúne en Santiago máis de 2800 autoras e autores galegos, cataláns e vascos para debater sobre a creación escrita e o impacto da intelixencia artificial nas literaturas minorizadas. Durante dous días, desenvolveranse coloquios, diálogos e un peche artístico con música e improvisación oral. A iniciativa quere fortalecer o diálogo entre linguas e culturas e reivindicar unha maior visibilidade destas no conxunto do Estado.

Fonte: Xornal de Compostela

A Xunta de Galicia abre o prazo para inscribirse nunha nova convocatoria das probas que permiten obter os certificados oficiais que acreditan o coñecemento da lingua galega. Así, tras a publicación no Diario Oficial de Galicia, as persoas interesadas en realizar os exames Celga poderán anotarse ata o vindeiro 3 de outubro.

Fonte: O Portal da Lingua Galega

Este curso de galego de nivel básico (A2) para persoas que veñen de fóra de Galicia e desexan aprender galego ten carácter presencial. Para matricularse cómpre ser maior de 16 anos e non é necesario ser alumno/a da USC.

Fonte: Consello da Cultura Galega

«Coa lingua de fóra» é unha actividade organizada polas bibliotecas municipais da Coruña dirixida a persoas adultas que desexen practicar galego nun grupo de conversa, que se reunirá semanalmente entre os meses de outubro e decembro, dinamizado por unha persoa nativa.

Fonte: Consello da Cultura Galega

O secretario xeral da Lingua, Valentín García, participou na rolda de prensa de presentación da vixésima edición das Xornadas Mar por Medio, que organizan o Concello de Ribadeo e mais a Academia Xacobea coa colaboración da Consellería de Cultura, Lingua e Xuventude e da Universidade de Santiago de Compostela. 

Fonte: O Portal da Lingua Galega

A Xunta de Galicia e as tres universidades galegas poñen en marcha unha campaña conxunta para o fomento do uso da lingua mediante un convenio a través do que o Goberno autonómico achega 30.000 €. A iniciativa, coordinada pola Comisión Interuniversitaria de Normalización Lingüística, foi presentada polo secretario xeral da Lingua, Valentín García, destacando que “se trata da primeira acción deste tipo que se desenvolve entre as tres institucións académicas”.

Fonte: O Portal da Lingua Galega

Proxector, iniciativa de divulgación el galego impulsada polo Consello da Cultura Galega e a USC, dedica a súa nova entrega á xustiza social e á cultura da paz. A escolma reúne vídeos educativos sobre os Obxectivos de Desenvolvemento Sostible, a importancia da equidade e o labor de grupos de investigación universitarios.

Fonte: Consello da Cultura Galega

O Concurso de Relato Curto, que chega á súa segunda edición, é unha aposta do Concello do Rosal que ten como obxectivo fomentar a creatividade e a cultura en galego. Con tres categorías (infantil, xuvenil e poboación adulta), valorarase que as obras se inspiren no contorno e as tradicións do municipio.

Fonte: Tele Mariñas

A Real Academia Galega e Alingua organizarán en Rois a xornada de presentación do proxecto «Modo galego, actívao!», destinada a dar a coñecer este programa que promove o uso do galego entre a infancia. A actividade, iniciada en Ames en 2021, implicou alumnado, familias, profesorado e persoal educativo, e pretende avaliar e difundir prácticas de dinamización lingüística. O encontro contará con autoridades e especialistas que explicarán os catro anos de implementación e os resultados obtidos con este programa.

Fonte: Real Academia Galega