A Universidade de Hawai e outros departamentos de lingua hawaiana deste estado dos EUA crearon o proxecto 'Ōlelo of the Week' que permitirá aprender e difundir unha palabra hawaiana cada semana co obxectivo de animar máis persoas a aprenderen a lingua vernácula do arquipélago.

Fonte: University of Hawai'i News

Un acordo entre o Instituto Camões e a Universidade de Costa Rica permitirá crear un lectorado de lingua portuguesa neste país americano. Trátase do primeiro lectorado de portugués en América Central.

Fonte: Observador

O Instituto Camões e a Dirección Xeral do Libro, Arquivos e Bibliotecas e Asuntos Exteriores de Portugal crearon o catálogo de lingua portuguesa Gram Bem Querer que recompila fragmentos de obras de autores lusófonos traducidos cara ao inglés.

Fonte: República Portuguesa

Segundo unha enquisa do Instituto de Políticas Migratorias dos EUA, o portugués é a terceira lingua máis falada, despois do inglés e o español, de tres estados: Massachusetts, Connecticut e Rhode Island.

Fonte: Rally Mundial

Un proxecto elaborado na biblioteca da Universidade de Gotinga, Alemaña, pretende recompilar o máximo número de obras publicadas en linguas do Ártico e Siberia. O obxectivo é asegurar que as obras non se perdan.

Fonte: Eye on the Arctic

No inicio do curso 2021/2022, só un 33 % do alumnado de ensino básico de Luxemburgo ten o luxemburgués como lingua materna, fronte a unha porcentaxe do 60 % de hai dúas décadas. Porén, o luxemburgués é a lingua de comunicación maioritaria: o 80 % das crianzas domina este idioma.

Fonte: Contacto

O Goberno do Reino Unido apoiou a proposta dun parlamentario laborista que pretende dotar a lingua de signos británica de recoñecemento oficial. Grazas á medida, as persoas xordas poderían ter acceso igualitario á educación e servizos públicos.

Fonte: The Guardian

Un estudo realizado por varias universidades de diferentes países revelou que nunha mostra de 332 linguas do mundo, as palabras que describen texturas rugosas ou ásperas adoitan conter o son vibrante /r/. Trátase dunha semellanza fónica que está presente en linguas tan dispares como o éuscaro ou o mongol e que se remonta a máis de 6000 anos atrás.

Fonte: EurekAlert

A Corporación Nacional de Desenvolvemento Indíxena de Chile (CONADI, polas súas siglas en español) presentou Wallontu Mapu Ñi Mognen, unha serie documental narrada en lingua mapuche ou mapuzugun.

Fonte: Lanco

Segundo o último relatorio das tendencias do estudo de idiomas no Brasil, o turco foi en 2021 o idioma estranxeiro que máis creceu en popularidade na plataforma Duolingo.

Fonte: Segs