Representantes da Fundación Wikipedia alertaron que certas entradas da enciclopedia virtual sobre o cambio climático en linguas como o suahili ou o bielorruso ofrecen información enganosa ou conspiradora non contrastada pola ciencia.

Fonte: BBC

Un grupo de deputadas e deputados do Parlamento Nacional de Timor Leste presentou un relatorio onde se cuestiona o dominio da lingua portuguesa por parte da comunidade docente do país e propón un cambio na súa formación.

Fonte: SAPO

Un grupo de profesoras da illa de Man elaborou un conxunto de pósters trilingües (en manés, gaélico escocés e irlandés) sobre varios temas co fin de que as persoas que aprenden a lingua manesa na illa de Man coñezan e fortalezan os vínculos culturais e lingüísticos con outros lugares de fala gaélica das illas británicas.

Fonte: IOM Today

Autoridades do departamento de Educación de Siria confirmaron que un total de 31 mil estudantes aprenderon ruso desde a posta en marcha do Proxecto Nacional de Ensino que impulsa a aprendizaxe deste idioma eslavo.

Fonte: Prensa Latina

O Teatro Dramático Real de Suecia, o máis importante do país escandinavo, presenta a obra Waiting for Godod, a primeira produción feita en lingua yiddish que se representa na historia do coñecido teatro.

Fonte: Jewish Telegraphic Agency

A Cámara de Representantes dos EUA aprobou unha lei que garante a incorporación de sinais en linguas estranxeiras nos aeroportos estadounidenses. O obxectivo é facilitar o tránsito de turistas estranxeiros.

Fonte: Las Vegas Review Journal 

A canle pública de lingua galesa S4C presentou a Siân Doyle como nova directora executiva, cargo que comezará a desempeñar a comezos do ano próximo.

Fonte: Business Live

A canle de televisión pública France 3 preparou unha programación especial en 9 linguas rexionais francesas en ocasión da Semana das Linguas Rexionais que terá lugar entre o 22 e o 28 de novembro.

Fonte: Jornalet

Representantes de arredor de 50 grupos e asociacións en defensa do gaélico irlandés mobilizáronse en Belfast para demandarlle ao secretario de Estado de Irlanda do Norte, Brandon Lewis, que actúe para garantir a aprobación dunha lei que protexa e promocione o idioma.

Fonte: RTÉ

Un total de cen axentes da policía de seguranza pública portuguesa domina a lingua de signos co fin de dar unha atención adecuada ás máis de cen mil persoas xordas que viven en Portugal.

Fonte: RTP