O titular de Cultura, Ciro Gálvez, sinala que están a traballar nun proxecto de lei que permita que a comunicación do Estado cos pobos orixinarios se faga na súa propia lingua materna.

Fonte: El Comercio

Como cada 25 de agosto Paraguai celebra o Día do Idioma Guaraní coa organización de actividades ao abeiro da oitava edición da campaña “Rohayhu che ñe’ẽ”, unha iniciativa coa que se pretende poñer en valor esta lingua.

Fonte: Muni Py

O Parlamento venezolano aprobou por unanimidade a reforma parcial da Lei de idiomas indíxenas, que recolle as novas competencias do Instituto Nacional de Idiomas Indíxenas (INII) e establece os requirimentos para traducir e interpretar a Constitución do país. O obxectivo desta reforma é contar con ferramentas xurídicas que garantan a permanencia das linguas dos pobos orixinarios.

Fonte: El Universal

Persoal investigador da Universidade de Zürich realizou un estudo no que rastrearon once familias lingüísticas relacionadas durante máis de 10 000 anos. Unha das conclusións máis destacadas da investigación é que a gramática é un espello da evolución cultural e xenética do ser humano e, polo tanto, reflicte a xenética máis que calquera outra característica cultural.

Fonte: Apendemás

A lei municipal n.º 7942 garántelle ao alumnado das escolas de Criciúma o dereito á aprendizaxe da lingua portuguesa. Así mesmo, inclúe a prohibición da linguaxe neutra nos plans de estudo e o material didáctico dos centros educativos públicos e privados.

Fonte: Notisul

Unha semana despois da convocatoria electoral, os catro principais partidos políticos de Ottawa discuten sobre quen defende máis a lingua francesa.  

Fonte: Le Journal de Montréal

En Bolivia hai 36 linguas indíxenas recoñecidas na Nova Constitución Política do Estado e grazas ao plan de rescate para a súa recuperación tradúcense os alfabetos orixinarios en dicionarios e créanse institutos para revitalizalas.

Fonte: La Razón

A asociación Scola Corsa pretende abrir dúas escolas de inmersión en corso na rexión de Bastia. O obxectivo é que o alumnado aprenda esta lingua mediante o seu uso en todas as actividades do centro, dende o comedor ata as actividades deportivas.

Fonte: France Télévisions

Para o director do Instituto Camões, a música, o audiovisual, a literatura, a arquitectura, a gastronomía ou o turismo son áreas que poden axudar a impulsar a presenza do portugués en todo o mundo.

Fonte: Plataforma

OtomíApp é unha aplicación que pretende evitar o desprazamento que está a sufrir a lingua otomí, xa que só conta con arredor de 500 falantes e as novas xeracións non a aprenden.

Fonte: DigitalMex