O Congreso dos Deputados de Bolivia aprobou un proxecto de lei que garante políticas orientadas a revitalizar, preservar e difundir as linguas orixinarias do país. 

Fonte: El Diario

Recentemente multinacionais foráneas compraron terreos para a plantación extensiva de árbores no País de Gales. Aínda que a reforestación pode contrarrestar a emisión de gases contaminantes á atmosfera, algúns produtores locais alertan que tamén pode supor un risco para a cultura e lingua locais.

Fonte: BBC

Un estudo da Universidade de Helsinqui revelou que aprender linguas estranxeiras pode alterar e mellorar a maneira en que o noso cerebro procesa os sons e os contidos musicais.

Fonte: Technology Networks

A organización a prol da lingua galesa Cych yr Iaith alertou que a recente declaración dunha canteira de lousa no municipio galés de Gwynedd como patrimonio mundial da Unesco podería supor un problema para a preservación da comunidade local de falantes de galés.

Fonte: Nation Cymru 

O presidente de Portugal, Marcelo Rebelo de Sousa, foi o encargado de entregar a nova orde honorífica de Portugal, a medalla Camões, ao Museo da Lingua Portuguesa de São Paulo. 

Fonte: Público

Un estudo elaborado polo Consello Superior da Lingua Francesa (CSLF, polas súas siglas en francés) revelou que o uso do inglés como lingua docente nas universidades francófonas do Quebec non é tan dominante como se pensaba nun principio. A análise concluíu que nove de cada dez programas de estudos son ofertados exclusivamente en francés.

Fonte: CTV News 

Un acordo de colaboración entre o Consulado de Francia en Nova Orleans e o Ministerio de Educación de España permitirá que un total de 80 profesores e profesoras de diferentes países traballen pola inmersión en francés e español nas escolas públicas do estado de Luisiana (EUA).

Fonte: The Advocate 

O presidente de Portugal, Marcelo Rebelo de Sousa, o presidente de Cabo Verde, Jorge Carlos Fonseca, e outras autoridades dos países lusófonos acompañaron o gobernador de São Paulo, João Doria, na reapertura do Museo da Lingua Portuguesa, cinco anos despois do incendio que obrigou a pechalo.

Fonte: O São Paulo

Vinte e nove comunas locais de Iparralde adoptaron xa a carta local a favor do éuscaro coa que pretenden desenvolver iniciativas de promoción e protección deste idioma no ámbito municipal.

Fonte: Mediabask

Un programa do Goberno británico introducirá o ensino do latín en 40 escolas de ensino secundario de Inglaterra. De acordo con datos do British Council, só un 3 % dos centros públicos de educación secundaria ofertan esta materia fronte a un 49 % das escolas privadas.

Fonte: The Guardian