O Goberno británico revisará as súas políticas migratorias e reforza os requisitos de inglés para quen queira establecerse no país. A medida forma parte dunha reforma máis ampla do sistema migratorio e busca favorecer a integración. Porén, empresarios temen que poida provocar escaseza de persoal en sectores clave.

Fonte: Financial Times

A Semana da Lingua Italiana no Mundo é un acontecemento de promoción do italiano como lingua da cultura clásica e contemporánea que a rede cultural e diplomática do Ministerio italiano de Asuntos Exteriores organiza cada ano cunha ampla programación cultural e artística. O lema deste ano é "Italofonía: a lingua máis alá das fronteiras".

Fonte: Radio Capodistria

O rei Felipe VI presidirá o acto inaugural do X Congreso Internacional da Lingua Española (CILE) en Arequipa, Perú, no marco dun encontro que reunirá expertos internacionais en lingüística, literatura e humanidades.

Fonte: Europapress

O Ministerio de Defensa do Reino Unido destina arredor dun millón de libras esterlinas anuais a enviar fillos de persoal militar a colexios privados no norte de Gales, co argumento de garantir a súa “mobilidade”, xa que nas escolas públicas a docencia se imparte total ou parcialmente en galés. A información, revelada pola BBC, xerou polémica e foi cualificada polos independentistas galeses como un “insulto” á lingua galesa.

Fonte: Diari de la Llengua

En 2023, o 6,4 % do alumnado de educación primaria na Unión Europea aprendeu dúas ou máis linguas estranxeiras, fronte ao 4,6 % en 2013, o que representa un aumento de 1,8 puntos porcentuais. Luxemburgo destaca como o país con maior proporción, con case o 79 %.

Fonte: Eurostat

No período entre abril de 2024 e marzo de 2025, o organismo que vixía o cumprimento da lei lingüística en Quebec realizou 9 813 inspeccións, un 47 % máis que no período anterior, en resposta a 10 371 queixas presentadas pola cidadanía. As principais denuncias refírense a que non se ofrece servizo en francés en tendas ou sinais comerciais.

Fonte: CBC

O escritor húngaro László Krasznahorkai foi galardoado co Nobel de Literatura pola súa obra singular, profunda e visionaria. A Academia Sueca destacou a súa vinculación coa tradición centroeuropea, comparándoo con Kafka e salientando o seu dominio do absurdo e do exceso grotesco.

Fonte: DW

O parlamento suízo aprobou unha normativa que obriga as escolas primarias de todos os cantóns a continuaren ensinando unha das linguas nacionais como lingua adicional, reforzando a diversidade lingüística do país. A medida busca garantir que todo o alumnado aprenda tanto unha lingua propia como outra nacional.

Fonte: Diari de la Llengua

Un estudo realizado en Montreal mostra que os bebés comezan a procesar a linguaxe antes de nacer. A investigación, publicada en Nature Communications Biology, é a primeira en demostrar con imaxes cerebrais que o cerebro fetal xa comeza a recoñecer sons e patróns lingüísticos.

Fonte: Scientific American

A Mostra Galiza celebrarase en Coímbra para fortalecer os vínculos culturais entre Galicia, Portugal e o conxunto da lusofonía. Organizada pola Cena Lusófona e A Escola da Noite, en colaboración con máis dunha decena de institucións galegas e portuguesas, aposta por un enfoque interdisciplinario que une teatro, poesía, música, artes visuais e literatura, co Brasil como país convidado.

Fonte: O Minho