En Inari, na Laponia finlandesa, escolas infantís de inmersión están a recuperar o saami de Inari, unha lingua indíxena que estivo a piques de desaparecer. A través do uso exclusivo da lingua en xogos e actividades cotiás, estase a crear unha nova xeración de falantes. Esta iniciativa estase a converter nun dos casos máis exitosos de revitalización lingüística en Europa.
Fonte: BBC
O Parlamento Europeo organiza unha sesión en liña para marcar os 40 anos da oficialización do portugués como lingua oficial da Unión Europea tras a adhesión de Portugal en 1986. O encontro reflexionará sobre o papel do portugués nas institucións comunitarias, a importancia do multilingüismo e o labor da tradución institucional.
Fonte: Bom dia
A cidade de Bangor, no norte de Gales, organizará un evento comunitario que combina arte, música, gastronomía e actividades culturais centradas na promoción da lingua e cultura galesas. O festival inclúe actuacións en galés e obradoiros creativos abertos a residentes de todas as idades, co obxectivo de reunir a comunidade e fomentar o uso e visibilidade da lingua vernácula. Fonte: North Wales Chronicle
A radiotelevisión pública irlandesa RTÉ anunciou que ao longo de 2026 incrementará as retransmisións deportivas con comentarios en lingua irlandesa, incluíndo partidos destacados de fútbol e rugby. A medida amplía a presenza do irlandés nas emisións deportivas e forma parte da estratexia do ente público para promover o uso da lingua propia nos seus contidos audiovisuais.
Fonte: RTÉ
O presidente de Polonia, Karol Nawrocki, vetou a norma aprobada polo Parlamento que outorgaba ao silesiano o status de lingua rexional. O xefe do Estado xustificou a súa decisión con argumentos de carácter lingüístico e político, ao considerar que non existe consenso suficiente para o recoñecemento oficial.
Fonte: Diari de la Llengua
As autoridades letoas están a dar pasos para suprimir progresivamente a presenza da lingua rusa nas emisoras comerciais de radio. A iniciativa inscríbese nun conxunto de políticas orientadas a fortalecer o uso do letón nos medios de comunicación e no espazo público.
Fonte: United 24 Media
O Ministerio de Educación do Brasil anunciou que destinará recursos á produción e distribución de materiais didácticos en linguas indíxenas para centros educativos situados en territorios de pobos orixinarios. A medida pretende reforzar a educación bilingüe e contribuír á preservación de idiomas que forman parte do patrimonio cultural do país.
Fonte: Rádio Senado
O Goberno de Escocia reabriu unha bolsa de estudos de lingua gaélica para residentes da provincia canadense de Nova Escocia que estean interesados en mellorar a súa competencia na lingua gaélica e afondar na cultura escocesa. A iniciativa cobre parte da matrícula e do aloxamento no centro Sabhal Mòr Ostaig, o centro nacional de Escocia para o estudo da lingua e cultura gaélicas.
Fonte: Nova Scotia
A escritora portuguesa Lídia Jorge foi galardoada co prestixioso Prémio Pessoa 2025, recoñecido pola súa carreira literaria e polo impacto da súa obra no debate cultural e social. O presidente da República portuguesa, Marcelo Rebelo de Sousa, foi o encargado de lle entregar o premio á escritora.
O Goberno de Gales abriu o prazo de solicitude para o programa Cynllun Pontio, que apoia profesorado falante de galés que queira reconverterse en docente de secundaria. O programa ofrece salario durante a formación e xa beneficiou preto de 100 persoas desde 2020, co obxectivo de reforzar o ensino por medio do galés.
Subscríbase ao boletín
