En Budyšin (Bautzen), no leste de Alemaña, a minoría soraba loita por manter viva a súa lingua, a máis occidental das eslavas. Menos de vinte mil persoas falan hoxe sorabo, que a Unesco considera en perigo de extinción. Programas infantís como o centro Witaj, a sinalización bilingüe e o apoio estatal axudan, mais o futuro depende da transmisión familiar.

Fonte: VilaWeb

A casa editorial Oppian publicou o primeiro manual de lingua ucraína para falantes de finlandés que permitirá que se poida aprender o idioma eslavo sen pasar antes polo inglés.

Fonte: United 24

Un informe advirte da diminución do uso da lingua kurda entre a mocidade que vive en territorios do Kurdistán baixo control turco, o que pon en perigo a transmisión interxeracional e a continuidade do idioma. Esta tendencia contrasta cunha enquisa do Centro de Investigación Social e Política que mostra o apoio maioritario da poboación á preservación da lingua kurda.

Fonte: Diari de la Llengua

Desde o inicio de 2025, máis de 8000 persoas participaron no exame oficial de competencia en lingua quirguiz, segundo informou Batma Topoyeva-Stavinskaya, directora do organismo estatal Kyrgyztest.

Fonte: AKI press

O 43.º Seminario Internacional sobre Lingua, Literatura e Cultura Albanesas celébrase en Pristina, capital de Kosovo, coa participación de lingüistas e especialistas de varios países. O programa ofrece cursos intensivos de albanés, conferencias e relatorios sobre diversos aspectos da lingua e da literatura, así como actividades culturais complementarias.

Fonte: Gazeta Express

Un estudo realizado polo Instituto Nacional de Estatística e Estudos Económicos de Luxemburgo (Statec) revela que o portugués é a segunda lingua máis falada en Luxemburgo despois do luxemburgués. En 2021 o 15,4 % da poboación tiña o portugués como primeira lingua, superando o francés (14,9 %) e situándose tamén por diante do alemán (2,9 %) como lingua principal.

Fonte: Contacto

Segundo un novo estudo, máis da metade dos finlandeses están abertos a recibir atención sanitaria de profesionais que aínda estean aprendendo finés ou sueco. Esta análise demostra que a defensa da identidade propia pode coexistir coa aceptación da diversidade lingüística doutros pobos.

Fonte: Helsinki Times

A Confederación da Diáspora Kurda presenta o seu cuarto curso de lingua kurda en liña. O programa decorrerá unha vez por semana, cada domingo, e abranguerá as tres principais variantes dialectais da lingua e está deseñado para nenos e nenas kurdos que vivan no estranxeiro.

Fonte: Kurdistan 24

Cieltje Van Achter, ministra flamenga para Bruxelas, lanzou o "Totaalplan Nederlands", unha estratexia que reúne iniciativas existentes e novas para consolidar o neerlandés na capital belga. O plan promove que toda persoa en Bruxelas aprenda, practique e use o neerlandés, con especial atención á formación lingüística da poboación infantil e moza.

Fonte: Belga News Agency

O programa Lletres Compartides, lanzado hai catro anos para achegar os escritores da área lingüística catalá ao público doutros territorios, amplíase coa incorporación de Andorra e L’Alguer. Na presente edición, participan dezasete escritores das Illas Baleares, País Valenciano, Cataluña, Cataluña Norte, e agora tamén de Andorra e l’Alguer. 

Fonte: Diari de la Llengua