Desde o 1 de xaneiro de 2026, calquera persoa que traballe directamente co público en Lituania, tal como repartidores, taxistas, persoal de vendas ou de beleza, deberá coñecer o idioma lituano. A medida busca mellorar a integración das persoas estranxeiras e garantir que a cidadanía poida recibir servizos no idioma vernáculo.

Fonte: Baltic News Network

O goberno de Somalia anunciou que vai acelerar a incorporación do idioma suahili nos plans de estudo das escolas e universidades, facendo del unha lingua de instrución xunto co somalí, árabe e inglés.

Fonte: TRT Afrika

O goberno alxeriano continúa reducindo o uso do francés, tanto nas aulas como nas institucións públicas. As reformas educativas eliminarán o francés das escolas de medicina a partir de 2025, mentres que nas escolas primarias e secundarias xa se reduciron as horas dedicadas a esta lingua.

Fonte: Le Monde

O interese polo alemán está a aumentar en Turquía, especialmente entre a mocidade. O idioma converteuse na segunda lingua estranxeira máis demandada despois do inglés, con 35 centros públicos que xa imparten docencia en alemán.

Fonte: DW

O Goberno de Gales presentou un novo plan para protexer os nomes de lugares en galés, incluíndo a creación dunha páxina web onde a cidadanía poderá rexistrar nomes históricos ausentes nos mapas en liña.

Fonte: Nation Cymru

O Concello de Belfast aprobou un proxecto de lei histórico para promover o uso do irlandés na vida pública, incorporándoo, xunto co inglés, á sinalización municipal e promovendo o seu coñecemento e aprendizaxe.

Fonte: RTÉ

En Corea do Sur está a medrar con forza o interese por aprender as chamadas “linguas estratéxicas”. Decenas de miles de persoas, sobre todo mozos e mozas de entre 20 e 30 anos, están a inscribirse en cursos en liña gratuítos de ucraíno, portugués, persa ou turco. Moitos aseguran que a súa motivación nace da curiosidade, das ganas de coñecer novas culturas ou do soño de vivir e traballar no estranxeiro.

Fonte: The Korea Times

Recentes estudos constatan que a intelixencia artificial non é a solución para revitalizar linguas minoritarias. O caso grego, con dialectos como o tsakonio, mostra que sen comunidades activas e transmisión xeracional, as tecnoloxías non poden deter a súa desaparición, especialmente cando o corpus oral e escrito destas linguas na rede é tan escaso.

Fonte: Greek City Times

O goberno do Quebec aprobou unha medida para prohibir o uso de formas neutras e inclusivas nos textos oficiais en francés, como "iel" ou composicións tipo "étudiant.e.s", alegando que esas innovacións causan confusión e afectan a claridade da comunicación pública.

Fonte: CBC

A iniciativa LATE (Liña de Apoio á Tradución e á Edición), promovida pola Dirección Xeral do Libro, Arquivos e Bibliotecas do Ministerio de Cultura de Portugal e polo Instituto Camões, destinará este ano axudas a 152 obras de máis de 80 autores e autoras en lingua portuguesa para seren traducidas a 41 idiomas, coa colaboración de 103 editoriais de 43 países. Entre as linguas de destino destacan o español, o italiano, o francés, o árabe e o inglés e incluiranse obras de autores clásicos como Camilo Castelo Branco e Fernando Pessoa.

Fonte: Comunidade Cultura e Arte