O francés é a lingua máis demandada nas ofertas de emprego de Luxemburgo seguida do alemán. O luxemburgués ocupa o terceiro lugar e sobe un 17 % nos últimos cinco anos.

Fonte: Wort

Os xigantes da televisión en español Televisa de México e Univision dos EUA uníronse para crear a empresa Televisa-Univision que se converterá no maior grupo de medios de comunicación en español do mundo. A idea é competir con Netflix e Amazon no mercado dos contidos por internet.

Fonte: Techxplore

Un pequeno grupo de científicos e científicas crea a base de datos interactiva ASL-LEX que ofrece información visual e detallada sobre uns 3000 signos da lingua de signos americana. A ferramenta é de acceso gratuíto para todas as persoas interesadas.

Fonte: The Conversation

O Partido Nacionalista Escocés (SNP, polas súas siglas en inglés) anunciou que tomará medidas para crear unha zona recoñecida de fala gaélica se gaña as eleccións do próximo mes de maio. 

Fonte: The Herald

Unhas 600 persoas asinaron xa unha petición en liña que demanda que o friulano teña unha maior presenza na Radiotelevisión Italiana (RAI) por medio dunha estrutura autónoma con contidos nesta lingua.

Fonte: Il Friuli

Diferentes personalidades do mundo cultural e político de Cabo Verde pedíronlles ao presidente Jorge Carlos Fonseca e aos candidatos ás eleccións lexislativas que o crioulo caboverdiano se converta en lingua oficial do país africano.

Fonte: Deutsche Welle

O Ministerio de Transportes da provincia canadense de Ontario ofrece agora o exame teórico do permiso de condución en tres linguas nativas canadenses: ojibwa, oji-cree e cree. Coa incorporación destes tres idiomas son xa 27 as linguas en que se pode realizar este exame.

Fonte: CBC

A Universidade de Bruxelas está desenvolvendo unha plataforma en liña para facer un seguimento do uso na cidade de linguas nativas procedentes de países de fóra de Bélxica. O obxectivo é preservar e promocionar o uso destas linguas na capital belga.

Fonte: The Brussels Times

O Concello de Guimarães, en colaboración coa Universidade do Miño, anunciará o programa de conmemoracións do Día Mundial da Lingua Portuguesa que se celebra o día 5 de maio.

Fonte: Semanário V

En Ecuador fálanse 14 linguas nativas. Porén, unha estatística do Instituto de Idiomas, Ciencias e Saberes Ancestrais de Ecuador revelou que catro de cada dez indíxenas non saben falar o seu idioma orixinario.

Fonte: Extra