Malia a oposición do goberno, a Asemblea Nacional Francesa aprobou unha proposición de lei que abre a porta á inmersión en linguas minorizadas como o bretón ou o occitano e que permite un mellor financiamento das escolas privadas que escolaricen noutras linguas diferentes ao francés.

Fonte: Le Figaro

Conradh na Gaeilge (CnaG, polas súas siglas en gaélico) demandará nos tribunais o Goberno de Irlanda do Norte pola súa inacción á hora de aprobar unha lei que garanta a promoción do gaélico irlandés.

Fonte: BBC

O Goberno de Ucraína redactou un documento introdutorio que senta as bases para o futuro plan de desenvolvemento e promoción do idioma tártaro de Crimea, falado por un dos pobos orixinarios do país eslavo.

Fonte: Ukrinform

A canle pública de televisión en lingua galesa S4C lanzou un novo servizo de noticias en galés que vén acompañado dun novo sitio web e unha aplicación móbil.

Fonte: Nation Cymru

A Universidade de Columbia Británica ofrecerá en breve unha licenciatura superior en lingua indíxena nsyilxcn, un idioma en perigo de extinción falado polos indíxenas da Nación Okanagan.

Fonte: RCI

O Departamento de Educación de Australia Occidental permitirá que a lingua aborixe noongar (ou nyungar) poida impartirse no currículo formal das escolas do estado, tal como xa acontece coas linguas europeas ou asiáticas.

Fonte: ABC

A Secretaría de Estado de Educación, Deporte e Cultura do Brasil e o Departamento de Estado dos Estados Unidos de América ofrecen bolsas de formación a profesorado de ensino medio brasileiro. As bolsas consistirán nun intercambio de cinco meses en Washington (EUA).

Fonte: Infonet

A propósito das próximas eleccións lexislativas do 18 de abril en Cabo Verde, os candidatos dos dous principais partidos políticos avogan pola oficialización do crioulo como lingua nacional mais non asumen o compromiso de atinxir este propósito na próxima lexislatura.

Fonte: Observador

As asociacións que traballan pola promoción das linguas bretoas (o bretón e o galó) demandan a aprobación definitiva do proxecto de lei que garanta a protección das linguas rexionais de Francia.

Fonte: Ouest France

Unha profesora e coordinadora dun instituto da provincia canadense de Nova Escocia creou o primeiro curso de gaélico escocés que se pode estudar no Bacharelato Internacional (IB, polas súas siglas en inglés).

Fonte: The Chronicle Herald